Ish-ambasadori Gashi thotë se vitin e ardhshëm duhet të liberalizohen vizat

Ish-ambasadori i Kosovës në Francë, Qëndrim Gashi tha se vitin e ardhshëm duhet të liberalizohen vizat.
Gashi në emisionin veror “21 Gradë” në RTV21 u shpreh se liberalizimi duhet të ndodhë, përveç nëse ndodhë ndonjë befasi.
“Mesa e kam kuptuar unë, përveç nëse ka ndonjë befasi, e dimë sivjet p.sh ishte lufta që fillojë që edhe fatkeqësisht vazhdon në Ukrainë, sulmi rus. D.m.th përveç nëse ka ndonjë befasi do të duhej vitin e ardhshem të liberalizoheshin vizat. Në parim kjo është diçka që zyrtarët tanë besojë që e dinë, jam i sigurt që e dinë”, u shpreh Gashi.
Ai shtoi se kjo do të duhej të ndodhte shumë kohë më parë dhe është akt i vonuar.

Kosova është vendi i vetëm në Ballkanin Perëndimor që nuk gëzon liberalizim vizash me BE-në.
Vendi, që nga viti 2018, ka marrë rekomandimin për liberalizimin e vizave, pasi Komisioni ka konkluduar se i ka përmbushur të gjitha kriteret.
Komisioni vazhdon ta mbajë këtë qëndrim, por janë disa vende anëtare, si Franca, që shprehin rezerva për lëvizjen e lirë të kosovarëve./21Media