Izraeli miraton dozën e katërt të vaksinës

Izraeli ka miratuar një dozë të katërt vaksine antiCOVID duke u bërë një nga vendet e para që e bën këtë, ndërsa po përgatitet për një valë infeksionesh të nxitura nga varianti Omicron.
Nachman Ash, drejtori i përgjithshëm i Ministrisë së Shëndetësisë, njoftoi vendimin në një konferencë shtypi, duke thënë se dozat fillimisht do t’u jepeshin atyre me sistem imunitar të dobësuar.
“Ne do të vazhdojmë të gjurmojmë të dhënat në baza ditore dhe do të shohim nëse duhet ta zgjerojmë këtë rekomandim për më shumë nga popullata,” tha ai.
Qendra Mjekësore ‘Sheba’ më vonë tha se do të fillonte administrimin e dozës së katërt për pacientët me transplantim të zemrës herët të premten, transmeton rtv21.tv
Izraeli nisi provat e dozës së katërt në qendër në fillim të kësaj jave, duke e administruar atë te rreth 150 nga personeli mjekësor që kishin marrë një përforcues në gusht.
Izraeli ishte ndër vendet e para që prezantoi vaksinën kundër koronavirusit të Pfizer një vit më parë dhe filloi të nxjerrë përforcues verën e kaluar.
Rreth dy të tretat e popullsisë së Izraelit prej afro 9.5 milionë banorësh kanë marrë të paktën një dozë të vaksinës dhe rreth 4.2 milionë izraelitë kanë marrë të tre dozat, sipas shifrave të fundit të Ministrisë së Shëndetësisë.
Izraeli aktualisht ka më shumë se 22,000 pacientë aktivë, duke përfshirë më shumë se 90 që janë të sëmurë rëndë.
Të paktën 8,243 njerëz kanë vdekur nga COVID-19 në Izrael që nga fillimi i pandemisë./21Media