KESCO shpjegon tarifat e reja të energjisë të miratuara nga ZRRE

Kompania Kosovare për Furnizim me Energji Elektrike-KESCO sot ka dhënë shpjegime rreth tarifave të reja të miratuara nga bordi i Zyrës së Rregullatorit për Energji-ZRRE, për tarifat e reja të energjisë, që do të hyjnë në fuqi nga data 9 shkurt deri me 31 mars të vitit të ardhshëm.

KESCO ka bërë të ditur se për konsumin deri në 800 kWh nuk ka rritje. Pra, kjo vlen për të gjithë konsumatorët dhe të gjithë do të vazhdojnë të paguajnë njëjtë për 800 kWh e parë.

Bllok-tarifa që fillon nga shpenzimi mbi 800 kWh e tutje, sipas KESCO-s do të afektojë rreth 22% të konsumatorëve. Pra, për 78% të konsumatorëve nuk do të ketë fare rritje.

“Por, konsumatorët duhet të kenë kujdes pas kalimit të pragut ku është vendosur bllok tarifa. Kjo, pasi kilovatët e shpenzuar nga 801 e tutje kanë çmim të ndryshuar, që nxit kursimin e energjisë elektrike. KESCO njofton që është duke punuar në përditësimin e tarifave në aplikacionin e-KESCO, prandaj disa të dhëna nuk mund të shfaqen për momentin.”, ka bërë të ditur KESCO përmes komunikatës.

Ndryshe, Zyra e Rregullatorit për Energji (ZRRE) ka miratuar dje vendosjen e bllokut tarifor në 800 kW.