Kosova dërgon nesër në Gjermani mostra për testim të variantit Omicron
December 6, 2021Përditesimi i fundit: December 6, 2021
Kosova nesër do të dërgoj në Gjermani mostra për testim të variantit Omicron. Për portalin rtv21.tv këtë e ka konfirmuar drejtori i Departamentit të Mikrobiologjisë në Institutin Kombëtar të Shëndetësisë Publike, Xhevat Jakupi.
Jakupi ka thënë se numri i saktë i mostrave që do të dërgohen në Gjermani do dihet nesër.
“Po, nesër do të nisen mostra për testim të variantit Omicron. Numri i saktë i mostrave do të dihet nesër në mëngjes”, ka thënë Jakupi.
Për shkak të paraqitjes së variantit të ri Omicron, Qeveria e Kosovës ka miratuar masat e reja, të cilat hyjnë në fuqi nga sot.
Varianti i koronavirusit, Omicron për herë të parë është identifikuar në Afrikën e Jugut më 23 nëntor të vitit 2021. Ndërsa më 28 nëntor, Organizata Botërore e Shëndetësisë tha se e kishte klasifikuar këtë variant si “shqetësues” për shkak të disa mutacioneve dhe mënyrës se si ato mund të kenë ndikim në sjelljen e virusit, si për shembull se sa shpejt mund të shpërndahet apo shkallën e sëmundjes që shkakton.
Përveçse në Afrikën e Jugut, varianti është identifikuar edhe nëpër shumë vende të tjera, për çka shumë shtete si Britania e Madhe, Franca, Gjermania dhe Italia dhe Shtetet e Bashkuara kanë vendosur kufizime në udhëtime./21Media
