Kosova ka ende punë për të bërë drejt integrimit evropian

Liberalizimi i vizave si dhe pranimi i aplikimit për anëtarësim në Këshill të Evropës po shihen si dy nga hapat e Kosovës drejt integrimit evropian.

Lëvizja Vetëvendosje, vlerëson se Kosova është në rrugë të duhur drejt integrimit evropian dhe se puna në këtë drejtim nuk duhet të ndalet.

”Tash 7 vjet pas të fillimit të fazës të zbatimit të MSA-së Kosova shënon progres në këtë drejtim por ende ka punë. Mendoj që si institucione e kemi për obligim që edhe me shumë t’i pervishemi punës… Qëndron mirë(në rrugën drejt integrimit) sepse vit pas viti janë bërë raportime është vlerësuar se shkalla e realizimit të masave varion në disa …jemi në rrugën e mbarë por duhet pasur parasysh që na duhet një sforcim i përpjekjeve tona….”, ka thënë Driton Hyseni nga Lëvizja Vetëvendosje për RTV21.

Por ndryshe mendon opozita. Deputeti i partisë më të madhe opozitare, PDK-së, Elmi Reçica, ka thënë se Qeveria po bënë hapa të ngadaltë dhe jo të duhur drejt integrimit evropian.

“Kosova ende është larg integrimit evropian është e vërtetë që procesi për liberalizim ka përfunduar mirëpo gabim është mendu që vetëm procesi i liberalizmit është në agjendën evropiane ne kemi një rrugë të gjatë për ta bërë dhe normal që duke pasur parasysh ngathtësinë e kësaj qeverie që po mirret dhe çështje dhe prb që po e pengojnë haperimin unë konsideroj që ka hapa të ngadaltë dhe jo të duhur për integrim të Kosovës në BE”, ka thënë Reçica për RTV21.

Kryetarja e Komisionit parlamentar të Integrimit Evropian nga radhët e LDK-së, Rrezarta Krasniqi, për RTV21 ka thënë se qeveria duhet ta shumëfishojë punën e saj deri në anëtarësimin e Kosovës në BE.

“Ne kemi parë që të gjitha proceset integruese janë të lidhura me procesin e dialogut fatmirësisht procesi i vizave ka përfundu kanë pasur merita të gjitha qeveritë. Edhe për Këshill të Evropës, por qeveria s’duhet të ndalet duhet ta trefishojë punën që në vitin tjetër të pranohet aplikacioni për statusin e vendit kandidat. Nuk muj me thanë që qëndron edhe mirë sepse kemi parë që s’kemi njohje as anëtarësim në organizata ndërkombëtare pra sa i përket kësaj qeverie kemi vetëm regres të Kosovës në politiken e jashtme mirëpo fatmirësisht është pranu marrëveshja në Ohër dhe kaluan këto procese janë zingjir”, ka thënë Krasniqi.

Për njohësin e Integrimit Evropian, Seb Bytyçi, me gjithë përparimin në disa çështje, Kosova ka ende punë për të bërë drejt integrimit evropian.

“Është bërë progres për çështjen e anëtarësimit në KE aty pritet t’i hapet rruga Kosovës, aty qëndron mirë kurse sa i përket iniciativave të tjera Kosova mund të fokusohet në disa iniciativave rajonale…Tash shpresojmë se do të ketë përparim në fitimin e statusit kandidat për anëtarësim në BE ai do të ishte një hap shumë i rëndësishme kështu mendoj do vret kjo edhe nga presionet politike që bëhen për dialogun”, ka thënë Bytyçi për RTV21.

Pas një dekade përpjekjeje, Kosova gjatë këtij viti përmbylli procesin e liberalizimit të vizave. Po në këtë vit u pranua edhe aplikimi i Kosovës për anëtarësim në Këshill të Evropës, derisa aplikimi për anëtarësim në BE vazhdon të qëndroj në sirtarë të presidencës së BE-së./21Media