KQZ pritet të marrë vendim për rinumërim të rreth 500 vendvotimeve

 

Komisioni Qendror i Zgjedhjeve do të mbajë mbledhje gjatë ditës së sotme në të cilën do të paraqitet një raport nga Qendra e Numërimit dhe Rezultateve dhe do të votohet rekomandimi për rinumërim të rreth 500 vendvotimeve.

Këtë ka konfirmuar zëdhënësi i KQZ-së Valmir Elezi, duke thënë se anëtarët e KQZ-së gjatë mbledhjes pritet t’i votojnë rekomandimet për rinumërimin e vendvotimeve.

“Mund t’iu konfirmoj se në mbledhjen e sotme të KQZ-së do të paraqitet një raport nga Qendra e Numërimit dhe Rezultateve me disa rekomandime për rinumërim të rreth 500 vendvotimeve dhe natyrisht se anëtarët e KQZ-së do ta shqyrtojnë dhe do të marrin vendim meritor”, tha Elezi.

Elezi shtoi se QNR-ja ka ardhur deri te këto rekomandime pasi këto vendvotime nuk kanë mundur të kalojnë procesin e auditimit.

“Arsyet janë të ndryshme dhe kryesisht kanë të bëjnë me bartjen e gabuar të votave në formularin e subjekteve politike dhe formularin e kandidatëve; si dhe për shkak se në një numër të madh të vendvotimeve kandidati apo kandidatët kanë më shumë vota se subjekti politik”, ka thënë Elezi.