“Krahu i djathtë” i Macron-it akuzohet për konflikt interesi

Zyrtari i lartë në zyrën e Emmanuel Macron është akuzuar për konflikt interesi.
Masa kundër Alexis Kohler, i cili mban një nga postet më të fuqishme të Francës si sekretar i përgjithshëm i ElysEe, erdhi disa orë pasi një tjetër aleat i presidentit francez, ministri i drejtësisë, Eric Dupond-Moretti, u urdhërua të dalë në gjyq në një çështje të veçantë, gjithashtu për një konflikt interesi.
Kohler akuzohet për lidhjet e tij profesionale dhe familjare me firmën italo-zvicerane të transportit Mediterranean Shipping Company (MSC), e cila drejtohet nga kushërinjtë e nënës së tij, tha në një deklaratë prokurori Jean-François Bohnert, përcjell rtv21.tv
Të hënën, Kohler “mohoi kategorikisht çdo keqbërje”, tha avokati i tij, ndërsa një zyrtar në zyrën e Macron tha se Kohler mbeti në postin e tij.
Në vitin 2018, Anticor, një organizatë joqeveritare kundër korrupsionit, paraqiti një ankesë ligjore kundër Kohler për tregti të paligjshme të ndikimit në lidhje me kontratat e dhëna MSC në vitin 2010 dhe 2011, raporton The Guardian
Kohler dyshohet se nuk i zbuloi lidhjet e tij familjare me MSC në agjencinë franceze për investime publike, ku ai punonte në atë kohë. Çështja u pushua vitin e kaluar, por në vitin 2020, Anticor ngriti një çështje civile, e cila zakonisht shkakton një hetim nga një gjykatës.
Kohler, zyra e të cilit në Elysee ndodhet pranë asaj të presidentit, shpesh përshkruhet si krahu i djathtë i Macron. Puna e tij përfshin trajtimin e emergjencave, çështjeve të mëdha ekonomike dhe sociale, si dhe disa vendime politike.
Avokati i tij, Eric Dezeuze, tha se zbulimi i provave të lidhura me akuzën do të lejonte Kohler “të provonte pafajësinë e tij”.
Por avokati i Anticor, Jean-Baptiste Soufron tha se “çështja e dorëheqjes së tij tani është në tryezë”./21Media