Kurti: Në Pakon e Ringjalljes ekonomike, vëmendje të veçantë i është dhënë fuqizimit të grave

“Gratë janë shumë më pak në ndërmarrësi krahasuar me burrat. Por, ato që janë, ta zëmë 11%, ndoshta numërojnë sfida më shumë se sa rreth 90% e burrave në ndërmarrësi”, tha  sot Kryeministri Albin Kurti, në forumin “Gratë në Ndërmarrësi”, me të cilin u hap Java e Ndërmarrësisë, organizuar nga Oda Amerikane në Kosovë.
Kryeministri Kurti tha se sot mund t’i listojnë sfidat, por edhe të arriturat, t’ua njohim meritat dhe përpjekjet grave, që tashmë janë në biznes. Ai theksoi se me shembullin e tyre, ato janë duke inkurajuar edhe shumë gra të tjera, kurse me kontributin që japin, janë duke e ndihmuar punësimin, tregun dhe ekonominë.
“Andaj, në kuadër të Pakos së ringjalljes ekonomike, vëmendje të veçantë i është dhënë fuqizimit të grave në ekonomi e shoqëri”, tha kryeministri, teksa shpjegoi Masën 1.3 – Mbështetja e punësimit të grave, me të cilën është paraparë që secila grua që nuk ka qenë e punësuar në tre muajt e fundit e që është punësuar, t’i subvencionohet 50% e pagës për tre muajt e parë, deri në maksimumin prej 150 euro në muaj. Pas periudhës tre mujore grave të punësuara u subvencionohet kontributi pensional deri në qershor të vitit 2022.
Siç bëri të ditur Zyra e Kryeministrit, Kurti tha se këto masa do të aplikohen edhe për bizneset në pronësi të grave, pavarësisht sektorit.
“Më tej, ai shtoi se mbështetja e bizneseve të grave – është masa tjetër, nëpërmjet të cilës të gjitha gratë që kanë në pronësi biznese dhe që dëshirojnë të zgjerojnë biznesin e tyre, mund të aplikojnë për subvencionim të kredisë investive deri në 20 për qind të kryegjësë, pra duke mos marrë parasysh sektorin në të cilin e kanë ndërmarrësinë e tyre. Ndërsa me Projektligjin për buxhetin e vitit 2022, i cili u miratua në Qeveri ditë më parë, do të fillojë ndërtimi i 50 çerdheve në tërë vendin, që fëmijët të kenë kujdesin e duhur e gratë të integrohen në tregun e punës, dhe sidomos nënat të kenë më shumë kohë për studim e punë.”, u bë e ditur në komunikatë.
Kurti shtoi se nuk beson që mund të ketë barazi në shoqëri, pa barazi gjinore./21Media