Kurti: Nxënësit e Kamenicës do ta kenë një shkollë që i plotëson kushtet për zhvillimin

Sot, në përvjetorin e 58-të të shuarjes së rilindasit, Fan S. Noli në komunën e Kamenicës u bë vënia e gurthemelit për ndërtimin e shkollës së mesme të ulët, e cila mban emrin e tij. Kjo shkollë do të ketë gjithsej 20 klasa e pjesë tjera përcjellëse të cilat do të ofroj kushte më të mira për mësim si për nxënësit ashtu edhe për mësimdhënësit.

Kryeministri i Kosovës, Albin Kurti u shpreh se vënia e gurthemelit të kësaj shkolle po bëhet pikërisht në përvjetorinë e 58-të shuarjes së rilindasit, Fan S. Noli, emrin e të cilit e mban edhe kjo shkollë.

Ai tha se kjo shkollë i plotëson kushtet për zhvillim të nxënësve, të cilët për një kohë të gjatë kanë mësuar në kushte të vështira.

Teksa e filloi fjalimin Kurti, nisi ezani i kohës së drekës, të cilin ai e respektoi dhe fjalimin e tij e vazhdoi, duke kërkuar rritje të cilësisë dhe duke shprehur angazhimin për këtë sektor.

“Po takohemi pikërisht në përvjetorin e 58- të të shuarjes së këtij rilindasi, përkujtimi i tij nëpërmjet emërimit të shkollës është simbolik me domethënie të madhe. Është zotim për vazhdimin e angazhimit për rrugën e dijes dhe të arsimit. Projekti i kësaj shkolle të mesme të ulët në Kamenicë është ai i një shkolle moderne do të ketë sipërfaqe bruto prej 4 mijë e 500 metrave katror me 20 klasë, 5 kabinete, 1 bibliotekë dhe menze moderne për ngrënie e hapësira adekuate sportive. Pas disa shkollimi në kushte të papërshtatshme nxënësit e Kamenicës do ta kenë një shkollë që i plotëson kushtet për rritjen dhe zhvillimin e tyre…Roli dhe potenciali i arsimit janë të pakontestueshëm dhe faktor vendimtar për zhvillimin e vendit, dhe kjo është arsyeja që ne kemi rritur buxhetin e arsimit për mbi 26% në dy vitet e fundit dhe e kemi bërë arsimin e lartë falas”, tha Kurti.

Ministrja e Arsimit, Shkencës, Teknologjisë, Inovacionit, Arbërie Nagavci u shpreh se ky projekt pritet të përfundojë brenda 36 muaj dhe ka koston 1 milionë e 700 mijë euro.

Ajo tha se ky objekt do të krijojë kushte më të mira për nxënësit, por edhe mësimdhënësit.

“Bashkë me Qeverinë e kemi trajtuar kërkesën dhe jam shumë e lumtur që në shkurt të këtij viti u lidh kontrata për ndërtimin e shkollës ‘Fan Noli’, i cili do të përfundojë diku për 36 muaj dhe projekti ka vlerën 1 milionë e 700 mijë euro duke ofruar kështu mundësi për nxënësit që të kenë kushte më të mira të mësimit, për stafin e mësimdhënësve, për gjithë menaxhmentin e shkollës që të punojnë në kushte më të përshtate për të ofruar më të mirën për fëmijët tanë. Përmirësimi i infrastrukturës është një nga parakushtet, infrastrukturës fizike në këtë rast dhe si MASHTI e si Qeveri kemi punuar që krahas përmirësimit të infrastrukturës fizike të punojmë edhe në infrastrukturën ligjore”, tha ajo.

E vënien e gurthemelit të kësaj shkolle, kryetari i komunës së Kamenicës, Kadri Rrahimaj e konsideroi si vendosje të themelit për gjeneratat e ardhshme.

Rrahimaj theksoi se shkolla e mesme e ulët “Fan Noli” do të jetë ndër më modernet në Kosovë.

“Gjersa po nisim udhëtimin e ri të kësaj shkolle duhet të kujtojmë se kjo nuk ka të bëjë vetëm me vendosjen e tullave dhe betonit, por po vendosim themelin për gjeneratat e ardhshme të Kamenicës dhe gjithë Kosovës. një themel i cili jo vetëm që do tu ofroj atyre siguri dhe aftësi për të pasur sukses, por gjithashtu do të pajisë me besimin dhe guximin për të kapërcyer çdo sfidë me të cilën mund të ballafaqohen në të ardhmen…Kjo shkollë përfaqëson shpresën, ëndrrat dhe aspiratat e komunitetit tonë, është simbol i vendosmërisë sonë të palëkundur për ta bërë Kamenicën një vend më të mirë për veten dhe fëmijët tanë…Projekti përmban 20 klasa, 5 kabinete, fusha sportive të jashtme salla multifunksionale të brendshme, menzë e kuzhinë për ushqim, ashensor dhe gjitha elementet e një shkolle moderne“, u shpreh Rrahimaj.