Kurti pyetet për ftesën e mundshme nga Osmani
Kryetari i Lëvizjes Vetëvendosje, Albin Kurti sërish ka refuzuar të përgjigjet pyetjeve të gazetarëve lidhur me dështimet e njëpasnjëshme të seancës konstituive për legjislaturën e nëntë.
Kryeministri në detyrë, Albin Kurti u pyet nëse do ta pranonte ftesën e presidentes së Kosovës, Vjosa Osmani lidhur me një takim të mundshëm me liderët e partive politike për gjetjen e një zgjidhje të ngërçit në Kuvendin e Kosovës.
Kurti u pyet nga gazetarët pas homazheve që bëri me rastin e 27-vjetorit të rënies së heroit Ilir Konushevci dhe dëshmorit Hazir Malaj, në varrezat e Velanisë në kryeqytet, raporton KosovaPress.
Sot, për herë të trembëdhjetë ka dështuar konstituimi i Kuvendit të Kosovës. Edhe sot Lëvizja Vetëvendosje insistoi që të formohet komisioni ad-Hoc për votim të fshehtë, por përsëri nuk mori mbështetjen e PDK-së, LDK-së, AAK-së, Nismës.
E në mungesë të kuorumit vazhdimi i seancës së sotme u ndërpre për të vazhduar më 11 maj nga ora 10:00.
Qysh në nisje të vazhdimit të seancës, kryesuesi, Avni Dehari kërkoi nga partitë politike që të propozojnë kandidatët për formim të komisionit për votim të fshehtë të kryekuvendarit.
Dëshiron ta dëgjosh këtë lajm me zë?