Kurti reagon për sulmin ndaj gazetarit Visar Duriqi
Kandidati për kryeministër nga Lëvizja Vetëvendosje, Albin Kurti ka reguar pas sulmit ndaj gazetarit, Visar Duriqit.
Kurti ka thënë se rrahja e gazetarëve për shkak të punës dhe fjalës së tyre është fenomen negative që populli i Kosovës nuk i duron.
Përmes një postimi në Facebook u ka bërë thirrje forcave të rendit që me profesionalizëm e angazhim të vënë sa më shpejt para përgjegjësisë dhunuesit, teksa i ka uruar shërim të shpejt Duriqit.
I pari i VV-së ka thënë se në qeverisjen e tij e konsideron si mision ruajtjen e demokracisë dhe të lirisë së fjalës, bindjes e veprimtarisë politike, sipas ligjit.
“Ata që mendojnë se mund ta ndalin demokracinë me gangsterizim, le ta dinë se koha e tyre ka perënduar. Njëri-tjetrin mund “ta mundim” vetëm me fakte, me argumente, me logjikë e me mjete demokratike”, ka shkruar Kurti në Facebook.
Pas sulmit ndaj Duriqit ka reaguar edhe Asociacioni i Gazetarëve të Kosovës (AGK), duke kërkuar nga organet e drejtësisë që sa më shpejtë t’i hetojnë motivet e sulmit dhe ta ndriçojnë këtë rast./21Media