Kurti takoi kryesuesin e LIDL për Evropë Qendrore dhe Lindore

Kryeministri i Kosovës, Albin Kurti, takoi kryesuesin dhe shefin për Evropën Qendrore dhe Lindore të LIDL, Maksymilian Braniecki si dhe përfaqësues të tjerë të kompanisë gjermane LIDL.
Përkushtimi i Qeverisë së Kosovës për të bashkëpunuar për zhvillim ekonomik dhe për të përkrahur nisma të reja, që sjellin deri te rritja e investimeve, u potencua në takim nga Kurti.
“Si faktorë të klimës së mirë për investime, ai theksoi potencialet investuese dhe arritjet ekonomike në Kosovë. Veçoi indikatorët pozitivë ekonomikë, si rritjen ekonomike impresive dyshifrore prej 10.53%, rritjen e eksporteve prej 83.6%, rritjen e investimeve të huaja direkte prej 21%, ngritje në pagesa tatimesh prej 30%, pa ndryshuar politikat fiskale, rritje të hyrave të Doganës prej 31%, si dhe punën drejt themelimit të Gjykatës Komerciale në Kosovë”, thuhet në njoftim.
Në takim ishin të pranishëm edhe zëvendëskryeministri Besnik Bislimi, ministrja e Industrisë, Ndërmarrësisë dhe Tregtisë, Rozeta Hajdari, drejtori i Doganës së Kosovës, Agron Llugaliu, drejtori i Administratës Tatimore, Ilir Murtezaj, u.d. i drejtorit të përgjithshëm të KIESA-s, Zef Dedaj, këshilltarja e kryeministrit, Fëllanza Podrimja, si dhe Besnik Miftaraj, konsull/këshilltar i Kosovës në Shtutgart, krahas përfaqësuesve të tjerë të kompanisë LIDL, drejtorit gjeneral të LIDL në Rumani, Marco Giudici, drejtorit për zgjerim të LIDL, Tomasz Kuzma dhe përfaqësuesve të bordit të LIDL.
Kompania “LIDL” GmbH & Co KG është zinxhiri më i madh i dyqaneve ushqimore në botë. Është themeluar në vitin 1973 dhe aktualisht ka shtrirje në 31 shtete të botës./21Media