Laporta: Messi nuk do të mund të kishte qëndruar edhe me largimin e Griezmann

Presidenti i Barcelonës, Joan Laporta ka insistuar që Lionel Messi nuk do të qëndronte me skuadrën e Barcelonës edhe nëse Antoine Griezmann do të largohej dhe lojtarët e Barçës do të pranonin ulje page.
Kriza financiare e Barcelonës, e cila raportohet të jetë rreth 1.35 miliard euro, ishte shkaku që Messi të largohej me parametra zero drejt Paris Saint-Germain.
Gerard Pique pranoi një ulje page, ashtu si edhe kapitenët e tjerë Sergio Busquets, Jordi Alba dhe Sergi Roberto, vetëm për të siguruar regjistrimin e Sergio Agueros për sezonin e ri të La Ligas, ndërsa në ditën e fundit të afatit kalimtar Antoine Griezmann kompletoi një rikthim sensacional tek Atletico Madridi.
“Messi nuk do të mund të kishte qëndruar edhe me largimin e Griezmann dhe me uljen e pagave nga kapitenët. Por është e rëndësishme që ne i kemi ulur disa nga pagat sepse vitin tjetër do të jemi më ambicioz.Të gjithë ishim të mërzitur, sepse situata nuk ishte ashtu siç e dëshiruam. Nuk kam folur ende me Messin që nga largimi. E kam përcjellë debutimin e tij me Paris Saint-Germain dhe ishte tejet e çuditshme që ta shoh në një ekip tjetër, te rivalët. Nuk më pëlqeu ta shihja në një fanellë tjetër”, tha Laporta.
Që nga largimi i Messit, Barcelona e ka nisur sezonin e ri të La Ligas në mënyrë të mirë, ku në tre xhirot e para ka regjistruar dy fitore dhe një barazim, dhe gjendet në kuotën e shtatë pikëve si Real Madridi, Sevilla, Valencia, Atletico Madridi dhe Mallorca.