Lia e majmunit, SHBA shpall gjendje emergjente shëndetësore

2 min read

(EPA)

Qeveria amerikane e ka shpallur gjendjen emergjente shëndetësore, pas rritjeve të rasteve të lisë së majmunit.

Vendimi do të përshpejtojë shpërndarjen e vaksinave, trajtimeve dhe burimeve federale për të ndalur përhapjen e virusit.

Vendimi ka ardhur në më pak se një dy javë pasi Organizata Botërore e Shëndetësisë (OBSH) ka lëshuar ​​alarmin pas një rritjeje të rasteve në mbarë botën.

Rastet kanë arritur në 6,600 në SHBA, sipas zyrtarëve shëndetësorë.

Një e katërta e këtyre rasteve janë shfaqur në shtetin e New Yorkut, i cili ka shpallur gjendjen e tij të jashtëzakonshme për shkak të sëmundjes javën e kaluar.

Dy shtetet me numrin më të madh të rasteve – Kalifornia dhe Illinois – kanë shpallur gjendje të jashtëzakonshme në fillim të kësaj jave, shkruan BBC, përcjell rtv21.tv

Përveç kësaj, më shumë se 26,000 raste janë konfirmuar në mbarë botën këtë vit, sipas të dhënave nga Qendrat e SHBA-së për Kontrollin dhe Parandalimin e Sëmundjeve (CDC).

Disa ekspertë të shëndetit publik kanë shprehur shqetësimin se deklarata e urgjencës mund të stigmatizojë më tej sëmundjen. Edhe pse çdokush mund të marrë linë e majmunit, shpërthimi ka qenë kryesisht i përqendruar te meshkujt homoseksualë dhe biseksualë. Por, nuk është thjesht një infeksion seksualisht i transmetueshëm (IST) dhe gjithashtu mund të transmetohet nga kontakti i ngushtë me një person të infektuar./21Media