Macron paralajmëron Libanin: Reformat deri në tetor ose s’ka ndihma

 

Presidenti i Francës Emmanuel Macron paralajmëroi të martën se Libani nuk do të merrte ndihmë ndërkombëtare nëse nuk fillon reformat deri në tetor.

Macron, i cili u takua me presidentin libanez, Michel Aoun dhe përfaqësuesit e partive më të forta të vendit, këmbënguli në nevojën për të reformuar sistemin e energjisë elektrike, bankar, gjyqësor dhe të prokurimit publik.

Ka pasur mungesa serioze të energjisë në Liban për disa muaj tani dhe Macron foli për korrupsionin në sektorin e energjisë dhe fusha të tjera.

“Gjithçka është gati, por nevojitet vullneti politik”, tha ai gjatë një vizite në portin e Bejrutit, ku kishte një shpërthim shkatërrues muajin e kaluar që mori më shumë se 180 jetë.

Macron tha se ai do të mbështeste orarin e reformave me “peshën e tij politike”, me një afat të parë të caktuar në tetor për mekanizmin e monitorimit.

Me përjashtim të ndihmës humanitare emergjente për shpërthimin e 4 gushtit, ndihma afatgjate nuk do të mbërrijë derisa të nisë procesi i reformës, tha Macron.

Presidenti i Francës tha se emërimi i ambasadorit të Libanit në Gjermani, Mustafa Adib për postin e kryeministrit ishte vetëm “hapi i parë i fazës tjetër”. “A do të rezultojë kjo në veprim? Unë nuk jam naiv,” tha ai.

Pavarësisht shprehjeve të pakënaqësisë, populli libanez zgjodhi në mënyrë demokratike udhëheqësit aktual, shtoi Macron.

Zgjedhjet janë planifikuar pas “6 deri në 12 muaj, të cilat do të tregojnë zemërimin e njerëzve dhe do të çojnë në një realitet të ri politik nëse populli e dëshiron atë.

Më parë, Politico citoi Macron të kishte deklaruar se sanksionet mund të vendosen ndaj udhëheqjes politike libaneze nëse ato nuk zbatojnë reforma serioze.

Libani shënon përvjetorin e krijimit të Libanit të Madh, kufijtë e të cilit ishin përcaktuar nga Franca dhe pasardhësi i të cilit është Libani modern.

Libani ka fituar pavarësinë nga Franca në vitin 1943. Në përvjetorin e kësaj dite, Macron mbolli një pemë në një pyll në veri të Bejrutit.