Mesazh solidariteti nga Duka: Christian, të presim në fushë sa më parë

 
Bota e futbollit është shokuar mbrëmë kur Christian Eriksen është rrëzuar në fushë dhe është dashur ndërhyrja e mjekëve që të shmangej tragjedia gjatë ndeshjes së Europianit mes Danimarkës dhe Finlandës, që po luhej në Kopenhagen.
Për fat të mirë, futbollisti danez ndodhet në spital dhe tashmë gjendja e tij duket e stabilizuar.
Pas kësaj ngjarjeje, presidenti i Federatës Shqiptare të Futbollit, Armand Duka, i ka dërguar homologut të tij danez, Jesper Moller një letër, me ç’rast i ka shprehur solidaritetin dhe urimin që futbollisti danez të kthehet sa më parë në jetën normale.
Kreu i qeverisë së futbollit shqiptar ka theksuar se të gjithë mendimet janë me Eriksen me shpresën që ai të kthehet sa më parë në fushën e lojës.
“Me tronditje të thellë e përjetova atë moment kritik kur Christian Eriksen bëri që e gjithë bota të mbante frymën nga ankthi dhe në të njëjtën kohë duke na bërë të gjithë bashkë në lutjet tona për ta kthyer gjendjen e tij në normalitet. Ndihem i emocionuar për forcën e pabesueshme që ai shfaqi për të luftuar për jetën e tij, për t’i rikthyer paqen e brendshme familjes së tij dhe të gjithë tifozëve të përlotur në stadium dhe padyshim për gjithë komunitetin e futbollit. Sot ne qëndrojmë të gjithë të bashkuar dhe të solidarizuar me lojtarin, besimplotë se ditët e bukura janë padyshim përpara. Përsëri, personalisht dhe në emër të çdo futbolldashësi shqiptar, dua të shpreh inkurajimin tim dhe urimin më të sinqertë që Eriksen të kthehet sa më shpejt të jetë e mundur në normalitet për të gëzuar jetën dhe familjen e tij. Eriksen, mendimet tona janë me ty dhe të presim në fushën e blertë sa më parë!”, ka theksuar presidenti Duka në letrën dërguar presidentit të Federatës Daneze të Futbollit, Jesper Moller.