Meta: Të garantohet vota në 25 prill

 

 

Presidenti i Shqipërisë Ilir Meta, u bëri thirrje institucioneve të drejtësisë që të garantojnë një proces zgjedhor të rregull dhe mos prekje të votës.

Në takimin me shoqërinë civile, Meta u shpreh se vota duhet të jetë e shenjtë dhe e barabartë.

“Çështja e zgjedhjeve është tashmë një çështje e të gjithë shoqërisë, sepse prej saj varet edhe integrimi i Shqipërisë. Vota duhet të jetë njëherë e përgjithmonë e shenjtë dhe e barabartë. Ne do t’i mbështesim të gjitha institucionet të bëjnë detyrën në këtë drejtim, përfshi edhe SPAK-un. Por me “cironkat” e dosjes së Dibrës dhe Shijakut nuk trembet asnjë nga ata që kanë ndërmend të venë dorë mbi procesin zgjedhor”, u shpreh Meta.

Tutje ai tha se qytetarët duhet të votojnë kandidatët që kanë më shumë vlera qytetare.

“Ju bëj thirrje të gjithë qytetarëve, të votojnë në listën e kandidatëve për deputet, personat më me vlera qytetare, më me integritet dhe më të përkushtuar ndaj komunitetit, që ata besojnë, për t’ju dhënë një mesazh në këtë mënyrë edhe kryetarëve të forcave politike”,- deklaroi kreu i shtetit”, tha Meta.

Në takimin me shoqërinë civile u ngrit si shqetësim mohimi i së drejtës së qytetarëve të infektuar me COVID-19 për të votuar.

Flitet për 30 mijë zgjedhës që në gjuhën e shifrave do të thotë 3 deputetë në parlamentin e ri dhe mund të jenë përcaktuese  për maxhorancat e ardhshme.