Mosmarrëveshja mbi turbinën kërcënon furnizimin me gaz në Evropë

Gjigandi rus i energjisë, Gazprom informoi se është e pamundur të rimarrë një turbinë që është jetike për furnizimin me gaz në Evropë për shkak të sanksioneve perëndimore.
Turbina 12 m (40 ft) është bllokuar në Gjermani pasi u kthye nga Kanadaja ku u riparua.
Berlini këmbëngul se pajisjet nuk preken nga sanksionet dhe akuzon Rusinë që nuk po respekton kontratat e saj për arsye politike.
Kohët e fundit, Gazprom ka reduktuar në mënyrë drastike dërgesat e gazit në Evropë.
Gazsjellësi kryesor, Nord Stream 1 nga Rusia në Gjermani funksionon me kapacitet 20%, shkruan BBC, përcjell rtv21.tv
Moska e ka furnizuar BE-në me 40% të gazit të saj natyror vitin e kaluar dhe shkurtimet kanë bërë që çmimet e shitjes me shumicë të rriten në mënyrë drastike.
Disa vende po luftojnë për të blerë gaz të mjaftueshëm për ta vendosur në magazinë për muajt e dimrit, kur përdorimi i gazit është shumë më i lartë.
Të mërkurën, kancelari gjerman, Olaf Scholz bëri një vizitë në fabrikën e Siemens Energy ku turbina është bllokuar, duke thënë se turbina ishte gati për t’u dërguar në Rusi në çdo kohë.
Moska tha se mund të riinstalojë turbinën – dhe të rrisë furnizimin me gaz – vetëm pasi të marrë dokumente që tregojnë se turbina nuk bie nën sanksionet perëndimore.
Gazprom ka kufizuar vazhdimisht rrjedhat e gazit përmes Nord Stream 1 – një tubacion kryesor Rusi-Gjermani:
Në qershor, ajo ka ulur prurjet në 40% të kapacitetit të zakonshëm, duke thënë se shërbimi kanadez i turbinës në fjalë ishte vonuar.
I gjithë tubacioni është mbyllur më pas për 10 ditë në korrik, duke përmendur nevojën për punë mirëmbajtjeje
Pas rihapjes së tij, Gazprom ka përgjysmuar më tej furnizimet në 20% të kapacitetit të mërkurën e kaluar, duke përmendur një problem teknik me një nga dy turbinat e fundit që funksionojnë.
Brenda një dite nga njoftimi i javës së kaluar, çmimi me shumicë i gazit në Evropë ishte rritur me 10%.
Berlini tha se nuk ka arsye teknike që Gazprom të kufizojë furnizimet dhe BE e përshkroi uljen e fundit si “të motivuar politikisht”.
Në fund të qershorit, Gjermania ka importuar 26% të gazit të saj nga Rusia. Ajo ka kërkuar furnizime nga gjetkë, ka planifikuar masa për të reduktuar konsumin dhe ka paralajmëruar qytetarët se faturat e energjisë do të rriten.
Hapja e një tjetër gazsjellësi paralel – Nord Stream 2 – është pezulluar nga Gjermania në përgjigje të agresionit rus në Ukrainë./21Media