Mosrespektimi i masave kundër Covid-19, mbyllen 7 lokale

 

Policia e Prizrenit ka njoftuar se më 7 dhe 8 gusht në bashkëpunim me inspektorët komunalë dhe inspektorët sanitarë nga AVUK, duke u bazuar në vendimet e Qeverisë së Kosovës për masat mbrojtëse kundër Covid-19, kanë zhvilluar aktivitete në parandalimin dhe respektimin e këtyre masave, me ç’rast kanë gjetur parregullsi.

Si rezultat i këtyre aktiviteteve janë mbyllur 7 lokale afariste, janë dhënë 353 vërejtje policore, janë hapur 8 raste për vepër penale nga neni 249 dhe 250, si dhe janë plotësuar 691 fletëparaqitje për mosmbajte të maskës.

Policia përmes një komunikate ka njoftuar se për kundërvajtje në komunikacion brenda këtyre dy ditëve janë shqiptuar 503 gjoba.

Tutje policia ka bërë të ditur se aktivitete të tilla do të jenë në vazhdimësi derisa situata me Covid-19 të ndryshojë dhe policia rajonale në Prizren do të jetë në zbatim të plotë të vendimit të Qeverisë./21Media