Mustafa nuk do zgjedhje në qershor

Për shkak te Ramazanit, Mustafa nuk dëshiron zgjedhje në qershor

Kryeministri i Kosovës dhe kryetari i LDK-së, Isa Mustafa ka thënë se partia e tij nuk dëshiron që të shkohet në zgjedhje gjatë muajit qershor, për shkak të Ramazanit, por vlerësoi se nëse PDK mendon se duhet të shkohet në zgjedhje, mund të bëjë veprime të njëanshme.

Ai në një intervistë për televizionin publik, ka theksuar se LDK-ja nuk është e interesuar që t’i ftojnë qytetarët në fushatë dhe në zgjedhje gjatë muajit të Ramazanit, pasi që dihet se numri i myslimanëve që agjërojnë është i madh.

“Nuk pajtohemi që zgjedhjet të mbahen në qershor dhe në Ramazan, pasi kemi myslimanë që agjërojnë dhe nuk mund t’i thërrasim në fushatë dhe ejani agjërueshëm të votoni pasi s’mund ta bëjmë këtë. Nuk pajtohemi që kjo të ndodhë tani, por që të ulemi dhe të merremi vesh”, tha Isa Mustafa për transmetuesin publik.

Ai gjithashtu foli edhe për përkrahjen e mundshme të PDK-së ndaj mocionit, ku tha se ndoshta kjo parti ka tjera synime dhe dëshiron të realizojë qëllimet e veta politike.

“Dhe kjo qeveri nuk është vetëm e LDK-së, por edhe e PDK-së, dhe nuk shoh asnjë arsye logjike që PDK-ja ta përkrah mocionin që do ta akuzonte ministrat si të dështuar ose si ministra ndaj të cilëve shprehet mosbesimi. PDK mund të ketë ndonjë qëndrim tjetër ndaj LDK-së, sepse edhe pse jemi partner jemi parti që kemi synuar të realizojmë qëllimet e veta. Nëse PDK është ngutur me këtë koalicion dhe mendojnë se duhet të shkohet në zgjedhje, mund të bëj veprime të njëanshme”, shtoi kryetari i LDK-së.

Ai foli edhe për takimin me ambasadorin Delawie, ku tha se ky i fundit i njoftoi deputetët se Amerika është e bindur që shenjëzimi i kufirit është në rregull.

Artikuj të ngjashëm

Shikoni Gjithashtu
Close
Back to top button
close button