“Ne të gjithë duam paqe”, Sandu falënderoi familjet që ndihmuan refugjatët ukrainas

Maia Sandu, presidentja e Moldavisë, falënderoi familjet e vendit të saj që hapën shtëpitë dhe zemrat e tyre për miliona refugjatë ukrainas.
Në fjalimin e saj në Asamblenë e Përgjithshme të Kombeve të Bashkuara në New York të mërkurën, Sandu tha se ajo përfaqëson një vend që dëshiron paqen. Ajo vuri në dukje se moldavët flasin një gamë të ndryshme gjuhësh, duke përfshirë ukrainishten dhe rusishten, por pavarësisht nga përkatësia etnike apo preferencat politike, të gjithë duan paqe, përcjell rtv21.tv
“Unë jam krenare për njerëzit e mi”, tha ajo.
Moldavia, e cila ka rreth 2.6 milionë banorë, strehoi më shumë se gjysmë milioni refugjatë që ikën nga lufta. Në kulmin e saj, popullsia e Moldavisë u rrit me 4% ndërsa ukrainasit kaluan kufirin, tha presidentja.
Sandu tha se rreth 800 mijë refugjatë zgjodhën të qëndronin në vend.
“Është detyra jonë morale si komunitet ndërkombëtar të vazhdojmë të mbështesim Ukrainën”, tha presidentja.
Fjalimi i Sandu vjen pasi Moldavisë iu dha statusi i kandidatit në Bashkimin Evropian në muajin qershor. Gjatë fjalës së saj, ajo tha se është mirënjohëse për mbështetjen nga shtetet anëtare dhe “për njohjen dhe votën e besimit në dashurinë tonë për lirinë” dhe demokracinë.
“Duke aplikuar për t’u anëtarësuar në Bashkimin Evropian, ne duam që bota të dijë se zgjedhim demokracinë mbi autokracinë, lirinë mbi shtypjen, paqen mbi luftën dhe prosperitetin mbi varfërinë”, tha Sandu./21Media