Nga nesër emisioni i ri i pullave postare ”Lojërat Olimpike Tokyo 2020”

Filatelia e Postës së Kosovës, nga nesër lëshon në qarkullim postar emisionin e ri të pullave postare të titulluar ”Lojërat Olimpike Tokyo 2020”.

”Në këtë olimpiadë botërore, Republika e Kosovës përfaqësohet me 11 sportistë të gjashtë sporteve të ndryshme; xhudo, mundje, not, atletikë, boks dhe shenjëtari sportive”, është bërë e ditur në komunikatë.

Posta e Kosovës, përmes imazheve të pullave postare dhe bllokut filatelik, mbështet sportistët tanë pjesëmarrës të Lojërave Olimpike, të cilët po ndërkombëtarizojnë sportin kosovar. Ata disa herë me trofetë e fituar ngritën lartë flamurin e shtetit të Kosovës, duke na bërë krenar të gjithëve.

Ky manifestim tradicional ka zanafillën në Greqinë e lashtë, në të cilin marrin pjesë atletë nga e gjithë bota. Lojërat Olimpike Tokyo 2020, nuk u mbajtën në vitin e kaluar për shkak të pandemisë COVID-19, por ato u shtynë për vitin 2021, me qëllim të ruajtjes së shëndetin publik./21Media



Back to top button