Nikolla: Pranimi i kërkesës së Kosovës për në KiE, sukses edhe i Shqipërisë

Kryetarja e Kuvendit të Shqipërisë, Lindita Nikolla, ka përshëndetur miratimin nga Komiteti i Ministrave i KiE të kalimit në Asamblenë Parlamentare të aplikimit të Kosovës për anëtarësim në Këshillin e Evropës.

Ajo ka thënë se kjo është një arritje për Kosovën, por edhe për Shqipërinë, pasi Kuvendi i Shqipërisë është përfshirë në një veprimtari intensive lobuese për t’ia arritur këtij qëllimi.

“Një lajm i bukur nga Strasburgu. Komiteti i Ministrave miratoi sot kalimin për shqyrtim në Asamblenë Parlamentare të Këshillit të Evropës të aplikimit të Kosovës për anëtarësim në Këshillin e Evropës. Kërkesa e Kosovës për t’u anëtarësuar në Këshillin e Evropës u miratua me 33 vota, nga 31 vota të nevojshme, për t’u shqyrtuar nga Asambleja Parlamentare. Një arritje për Kosovën, por edhe për Shqipërinë. Kuvendi i Shqipërisë është përfshirë në një veprimtari intensive lobuese për t’ia arritur këtij qëllimi. Lobimi do të vazhdojë deri në pranimin e Kosovës në organizatën më të madhe evropiane”, ka shkruar kryeparlamentarja Nikolla.

Aplikimi i Kosovës i anëtarësimit në Këshillin e Evropës është pranuar sot nga Komiteti i Ministrave të Këshillit.

Ministria e Punëve të Jashtme dhe Diasporës njoftoi se Këshilli i Ministrave përmbylli fazën e parë për anëtaresimin e Kosovës në Këshillin e Evropës, duke ia kaluar kërkesën për anëtarësim Asamblesë Parlamentare.