Një muaj paraburgim për të dyshuarin për plagosjen e dy serbëve në Shtërpcë
(Lajm i përditësuar)
Gjykata Themelore në Ferizaj ka vendosur konform propozimit të Prokurorisë Themelore të Ferizajt, për caktimin e masës së paraburgimit ndaj Azem Kurtajt, i dyshuar për plagosjen e dy personave në Shtërpcë.
Gjykata vendosi që kohëzgjatja e paraburgimit të jetë një muaj.
“Pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Departamentit për Krime të Rënda, ka vlerësuar se ekziston dyshimi i bazuar mirë, se i pandehuri më 6 janar 2023, në një fshatë të Komunës së Shtërpcës, me dashje ka tentuar që t`i privoj nga jeta të dëmtuarit M.S. dhe S.S., në atë mënyrë që derisa ishte duke lëvizur me veturën e tij dhe me të arritur në hyrje të fshatit, vëren disa qytetar në skaj të rrugës dhe me qëllim që t`i largon, i njëjti bie borisë, në pamundësi që të lëviz tutje e ndal veturën dhe pas një mosmarrëveshje verbale të ndodhur aty për aty e nxjerr revolen dhe shtënë dy herë duke i goditur të dëmtuarit, e që si pasoj e këtyre goditjeve lëndime trupore pësojnë të dëmtuarit të cilët fillimisht dërgohen në Shtëpinë e Shëndetit në Shtërpcë, e më pas në Spitalin në Graçanicë. Gjithashtu, në kohë dhe vende të përshkruar si më lartë i pandehuri në kundërshtim me ligjin e zbatueshëm lidhur me armët në Kosovë, ka përdorur armë me leje, në atë mënyrë përderisa ka qenë në veturën e tij, ka shtënë në drejtim të të dëmtuarve M.S. dhe S.S., e që si pasoj e goditjeve të njëjtit pësojnë lëndime trupore, me ç` rast me rastin e kontrollit të kryer nga ana e Policisë së Kosovës, arma së bashku me dy karikator dhe 35 cipë fishekë i sekuestrohen”, thuhet në komunikatën e Gjykatës.
Ekziston dyshimi i bazuar se më 6 janar 2023 në Komunën e Shtërpcës, i pandehuri me përdorimin e armës ka shkaktuar rrezik për jetën e njerëzve, në atë mënyrë që me veturën e tij në pamundësi që të kyqet në rrugën që dërgon në Qendrën e Skijimit, i njëjti kthehet në drejtim të Shtërpcës dhe me revole shtënë pesë herë në ajër.
Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.
Avokati thotë se ushtari i FSK-së shkrepi në tokë e në ajër për vetëmbrojtje
Ushtari i FSK-së, A.K., që akuzohet se të premten në Shtërpcë plagosi dy të rinj serbë, në mesin e tyre edhe një 11-vjeçar, thotë se ai shkrepi me armë në vetëmbrojtje.
Avokati i tij, Naim Ferati, ka thënë se klienti i tij kishte qenë duke udhëtuar për në Brezovicë, kur vetura e tij ishte rrethuar nga një turmë e njerëzve që po festonin. Ai thotë se vetura e tij u sulmua me mjete të forta, dhe në tentim për të shmangur sulmin “ai kishte shkrepur me armë në tokë dhe në ajër”.
“Të premten i mbrojturi im derisa po udhëtonte me një shok të tij për të drekuar në Brezovicë, të njëjtit gjatë rrugës ishin ndaluar nga një turmë e qytetarëve të cilët po festonin në rrugë dhe të cilët e kishin bllokuar veturën e të mbrojturit tim dhe në mënyrë të befasishme e kishim sulmuar me mjete të forta, konkretisht me drunj”, ka thënë avokati A.K., Naim Ferati.
“I gjetur në këto rrethana, e duke u ndier i rrezikuar nga sulmi serioz i turmës së njerëzve, i njëjti me qëllim të largohet nga aty kishte nxjerr revolen dhe duke e mbajtur në pozitë të ulët e duke mos e drejtuar ndaj asnjërit person, kishte shkrepur fillimisht në tokë e pastaj në ajër. Dhe nga ky moment i njëjti ishte larguar në Prevallë pa e kuptuar se nga ngjarja kishte të lënduar”, ka thë ai.
Ferati ka thënë se me të kuptuar se ka të plagosur, i njëjti ka njoftuar familjarët e tij dhe po ashtu Policinë e Kosovës.
“Nga kjo kuptohet qartë se i mbrojtur im nuk ka pasur asnjë qëllim që të qëllonte apo lëndonte ndonjë qytetar, por e gjithë ngjarja ishte zhvilluar në vetëmbrojtje. Ky vlerësim i mbrojtjes vërtetohet edhe nga vetë nëna e 11-vjeçarit të lënduar, znj. Zorica Stojanoviq, që në deklarimin e paraqitur për mediat në gjuhën serbe, tha se ‘nuk ka qëlluar në drejtim të tyre, por në asfalt”, ka thënë Ferati.