Organizatat mjedisore të zhgënjyera me Kurtin: Po qëndron i heshtur për shkeljet e Aliut

Organizatat “Pishtarët”, “Gjethi” dhe “EcoZ”, u kanë dërguar letër deputetëve të Kuvendit me rastin e Ditës së Tokës të hënën, më 22 prill.

Përmes kësaj letre organizatat në fjalë kanë akuzuar ministrin e Mjedisit dhe Planifikimit Hapësinor, Liburn Aliu, për aprovim të Udhëzimit Administrativ me anë të së cilit ka përjashtuar pjesëmarrjen qytetare nga vendimet që i prekin drejtpërdrejt ata, duke i dhënë vetes dhe operatorëve privatë autoritet të plotë që të vendosin për shfrytëzimin e resurseve natyrore.

Ata kanë shtuar se edhe kryeministri i Kosovës, Albin Kurti po hesht ndaj thirrjes së 50 organizatave dhe shoqërisë civile kundër këtij udhëzimi, për të cilin thuhet se e shkel nenin 52 të Kushtetutës dhe direktivat e Bashkimit Evropian që Kosova i ka për detyrë t’i transpozojë në mënyrë të plotë.

“Në vitin 2022, kemi kërkuar zyrtarisht anulimin e tij edhe nga Zyra e Kryeministrit e cila ka bërë analizën nga zyra ligjore ku ka udhëzuar Ministrinë e Mjedisit që të bëjë plotësimin për të përfshirë pjesëmarrjen publike. Por Ministri Aliu injoroi edhe udhëzimet e Zyrës së Kryeministrit. Së fundmi, ne me përkrahjen e 50 organizatave të shoqërisë civile në Kosovë dhe organizatës së mbrojtjes së lumenjve në Austri, Riverëatch iu kemi drejtuar me letër të hapur edhe Kryeministrit të vendit, z. Albin Kurti, me kërkesë të qartë: Anulimin e menjëhershëm të Udhëzimit Administrativ për Leje Mjedisore dhe sigurimin e plotësimit të tij menjëherë, sipas Kushtetutës dhe Direktivave të BE-së, për pjesëmarrje publike në procedurat e dhënies së lejeve mjedisore”, thuhet në njoftimin e lëshuar nga kjo organizatë.

Tutje, organizatat kanë shtuar se u është bërë thirrje edhe deputetëve që të ngrenë zërin në Kuvend dhe përmes mekanizmave ta ndryshojnë udhëzimin administrativ në fjalë.

“Ministri Aliu nuk duhet të lejohet të vazhdoj të jetë i vetmi autoritet të vendos për shfrytëzimin e resurseve natyrore nga te cilat varet jetesa jonë por edhe për faktin se toka dhe uji i Kosovës janë pasuri e përbashkët e jona që i kemi mbrojtur me shekuj me gjak dhe sakrifica të dhimbshme”, thuhet tutje në komunikatë.

Në fillim të këtij muaji, ministri Aliu është paditur pasi që i ka dhënë leje mjedisore kompanisë “Kelkos Energy” për hidrocentralin “Lumbardhi” në Deçan.

Tutje thuhet se ministriAliu është takuar fshehurazi me kompaninë në fjalë, në mënyrë që të pajisë këtë kompani me leje mjedisore.