Osmani takon Clintonin dhe Clarkun, heronjtë amerikanë të Kosovës
(Lajm i përditësuar)
Presidentja e Kosovës, Vjosa Osmani, ka takuar në Neë York, ish-Presidentin e Shteteve të Bashkuara të Amerikës, Bill Clinton dhe ish-komandantin e përgjithshëm të forcave evropiane të NATO-s, Wesley Clark.
Osmani në llogarinë e saj “Facebook”, ka publikuar një fotografi me Clinton dhe Clark, të cilët i ka quajtur heronj.
“Dy heronj, një histori, Kosova në mes!”, ka shkruar Osmani.
Ndryshe, Osmani po qëndron në New York, ku po mbahet sesioni i 78-të i Asamblesë së Kombeve të Bashkuara.
Presidentja e Kosovës Vjosa Osmani, është takuar me kancelarin e Gjermanisë Olaf Scholz.
Takimi ndodhi në New York, në pritjen e organizuar nga Scholz për nder të 50 vjetorin të anëtarësimit të Gjermanisë në Organizatën e Kombeve të Bashkuara.
Osmani u shpreh se partneriteti mes Kosovës dhe Gjermanisë është i palëkundur.
“E urova Kancelarin Scholz për angazhimin gjysmëshekullor të Gjermanisë për paqe, zhvillim dhe bashkëpunim kudo në botë. Jemi krenarë për partneritetin e palëkundur në mes dy vendeve tona, të cilin do të vazhdojmë ta forcojmë tutje!”, tha Osmani.
Osmani: Roli prijës i SHBA-së çon në njohjen e ndërsjellë nga Serbia
Presidentja e Kosovës, Vjosa Osmani, është takuar me këshilltarin e Departamentit të Shtetit, Derek Chollet dhe të dërguarin amerikan për Ballkanin Perëndimor, Gabriel Escobar, me të cilët ka diskutuar mbi procesin e dialogut.
Presidenca ka njoftuar të martën se sipas Osmanit, suksesi i dialogut varet nga qasja parimore dhe e barabartë në zbatimin e plotë të Marrëveshjes.
Sipas Osmanit, që po qëndron në New York, njohja e ndërsjellë mes Kosovës dhe Serbisë është çelësi i përmbylljes së dialogut.
“Suksesi i dialogut varet nga qasja parimore dhe e barabartë për zbatimin e plotë të marrëveshjes, por edhe nga angazhimi dhe roli prijës i SHBA-ve, e cila është çelësi për përmbylljen e suksesshme të dialogut dhe që do të çonte në njohje të ndërsjellë”, thuhet në njoftimin e Presidencës.
Osmani takohet me Chollet e Ecobarin, flasin për zhvillimet e fundit
Presidentja e Kosovës, Vjosa Osmani, ka takuar këshilltarin e Lartë të Departamentit amerikan të Shtetit, Derek Chollet, dhe të dërguarin special të ShBA-së për Ballkanin Perëndimor, Gabriel Escobar, me të cilët ka biseduar për zhvillimet në dialog me Serbinë.
Për këtë takim Osmani ka dhënë detaje në rrjetin social “X”.
“Theksova rëndësinë e një qasjeje parimore për zbatimin e plotë dhe të balancuar të marrëveshjeve dhe se roli i ShBA-së është kyç për të përfunduar procesin, duke i hapur rrugë njohjes reciproke”, ka thënë ajo.
Ndërsa Chollet tha se me Osmanin patën diskutim të mirë mbi përkushtimin e përbashkët për të ardhmen euro-atlantike të Kosovës e nevojën për të de-përshkallëzuar tensionet.
“Diskutim i mirë me presidenten Vjosa Osmani, mbi përkushtimin tonë të përbashkët për të ardhmen euro-atlantike të Kosovës, nevojën për të de-eskaluar tensionet dhe për t’u angazhuar urgjentisht në dialogun e lehtësuar nga BE-ja për normalizimin e marrëdhënieve me Serbinë – çelësi i stabilitetit rajonal dhe i integrimit në Bashkim Evropian”, ka shkruar Chollet në “X”.
Osmani ka udhëtuar në ShBA në kuadër të sesionit të 78-të të Asamblesë së Kombeve të Bashkuara.