Pakoja e Projektligjeve kundër korrupsionit drejt finalizimit

1 min read

 

Në kuadër të finalizimit të pakos së ligjeve kundër korrupsion, sot dhe nesër mbahet punëtoria dyditore për Projektligjin për deklarim, prejardhje dhe kontrollin e pasurisë së zyrtarëve publikë.

Ministria e Drejtësisë ka bërë të ditur se fokusi i diskutimeve po zhvillohet në çështjet e identifikuara si sfida dhe mangësitë e ligjit ekzistues, me theks të veçantë lista e deklaruesve të pasurisë, ku përfshihen edhe kategori të reja, deklarimi online, masat ndëshkuese dhe obligimi për deklarim të prejardhjes së pasurisë.

Në këtë punëtori po marrin pjesë përfaqësues të institucioneve përkatëse, partnerët ndërkombëtarë si dhe përfaqësues nga shoqëria civile.

Krahas finalizimit të Projektligjit për Agjencinë për Parandalimin të Korrupsionit i cili shumë shpejt do të procedohet për në Qeveri dhe pastaj në Kuvend, ky projekt ligj, do të procedohet për konsultime publike.

Ministria e Drejtësisë mbetet e përkushtuar për avancimin e legjislacionit kundër korrupsionit dhe për intensifikimin e përpjekjeve që deklarimi i pasurisë të jetë mjet efikas për parandalimin e abuzimeve me paranë publike.

Ndryshe, punëtoria mbështetet nga Zyra e UNDP-së në Kosovë.