Pas reduktimeve, Ministria paralajmëron masa për “hajnat” e rrymës

Disa orë pasi në Kosovë kanë filluar reduktimet me energji elektrike, Ministria e Eknomisë u deklarua për gjendjen e furnizimit me energji elektrike dhe masat e emergjencës.
Ministria bëri të ditur se prodhimi ditor i Korporatës Elektroenergjitike të Kosovës është rreth 507 MWh. Kërkesa për konsum është deri në 750 MWh. Ndërsa çmimi në bursën Hungareze (HUPX) është rreth 430 euro për MWh.
Humbjet komerciale (të shkaktuara nga vjedhjet) dhe teknike të Kompanisë KEDS janë 19%. Këto humbje, sipas Ministrisë, ende mbulohen nga të gjithë, pra prodhimi ose importi, jo nga vet KEDS-i.
Tutje, Ministria e Ekonomisë theksoi se institucionet përgjegjëse që monitorojnë punën e akterëve të furnizimit me energji janë duke marrë të gjitha hapat që furnizimi me energji elektrike t’i kthehet normalitetit.
“Kriza energjetike ka kapluar Evropën, siç kemi paralajmëruar me rastin e shpalljes së gjendjes emergjente në furnizimin me energji elektrike. Është me rëndësi që secila e secili prej nesh të kemi kujdes dhe të kursejmë shpenzimin e energjisë elektrike gjatë gjithë ditës. Kursimi i vogël individual do ta lehtësonte tejet shumë furnizimin me energji elektrike, si dhe do të lehtësonte vështirësitë të mëdha që po kalon dhe do të kalojë vendi. Ne jemi duke bërë gati masat jo vetëm për furnizim të rregullt, por veçanërisht për të ndërprerë përdorimin e paautorizuar të energjisë elektrike, pra humbjet nga vjedhjet. Këto humbje vazhdojnë të jenë shumë të larta e për të cilat kompania dhe institucionet përgjegjëse nuk kanë arritur rezultate”, thuhet në njoftim.
“Askush, e aq më pak qytetarët dhe buxheti i vendit, nuk duhet të paguajnë çmimin e lartë të importit për ata që tolerohen të vjedhin energji. Prandaj, në këto kushte Qeveria, me mjetet dhe kompetencat e saj, do të ndërhyjë për ta minimizuar deri në ndalje të plotë këtë dukuri, pa asnjë kompromis”, thuhet tutje në reagim.
Ministria theksoi se Qeveria e Kosovës do të marrë masa për çështjen e ngrohjes gjatë muajve në vijim për të ndihmuar qytetarët. Prandaj, sipas tyre, të gjithë qytetarët dhe sipërmarrësit të cilët janë duke planifikuar të bëjnë investime në sistemet e tyre të ngrohjes, ftohen e rikujtohen që t’i ndërrojnë ato nga energjia elektrike në forma të tjera të burimit të energjisë.
“Po ashtu ju njoftojmë dhe me të dhënat nga Korporata Elektroenergjitike e Kosovës si më poshtë: Kosova A – A3 dhe A4 janë në prodhim; Kosova B – B1 është përfunduar remonti dhe është në prodhim; B2 remonti ka filluar dhe do të përfundojë më 26 gusht 2022”, përfundon njoftimi./21Media