PDK hap fushatën, Hamza tregon premtimet e shprehet i bindur për kthimin e ish krerëve të UÇK-së
Kryetari dhe kandidati për kryeministër i Partisë Demokratike të Kosovës, Bedri Hamza gjatë hapjes së fushatës së PDK-së në Ferizaj, ka prezantuar pikat kryesore të programit të tij qeverisës.
Hamza premtoi rritje prej 50% të pagave në sektorin publik dhe pensioneve, duke thënë se se qeveria e udhëhequr nga ai do të jetë qeveri e punës, e zhvillimit dhe e dinjitetit për qytetarët.
“Ne do t’i ulim çmimet. Do ta heqim TVSH-në për produktet esenciale. Qytetarët duhet të kenë më shumë para në xhepin e tyre, jo më shumë barrë mbi shpinë. Ne do t’i rrisim pagat dhe pensionet. 50% rritje për sektorin publik. 50% rritje për pensionet dhe ndihmat sociale. Asnjë ndihmë sociale nën 250 euro, sepse askush në Kosovë nuk duhet të jetojë pa dinjitet. Ne do t’i mbështesim bizneset. Më pak tatime mbi pagat. Grante deri në 30% për investime. Mbështetje për prodhuesit vendorë. Mbështetje për sipërmarrësit. Sepse ekonomia nuk ndërtohet me propagandë. Ekonomia ndërtohet duke krijuar vende pune”, theksoi ai.
“Më 7 qershor, ju do të vendosni: A do të vazhdojmë me krizë? Apo do ta ndryshojmë Kosovën? Unë besoj që Kosova është gati. Gati për stabilitet. Gati për kompetencë. Gati për zhvillim.
Gjatë fjalimit të tij ai përmedni edhe ish krerët e UÇK-së që po mbahen në Hagë.
“Sot, liderët tanë Hashim Thaçi e Kadri Veseli, dhe bashkëluftëtarët e tyre Jakup Krasniqi e Rexhep Selimi, tanë ndodhen larg familjeve të tyre, në Hagë. Ne besojmë në drejtësi. Ne besojmë në të vërtetën. Dhe ne besojmë se historia nuk mund të rishkruhet. Ata nuk janë vetëm individë. Ata janë pjesë e historisë së Kosovës. Dhe unë besoj fort se ata do të kthehen faqebardhë. Do të kthehen krenarë. Do të kthehen më të fortë”, shtoi Hamza.
Dëshiron ta dëgjosh këtë lajm me zë?