Policia arreston një grua pasi dëmtoi tri vetura në Fushë Kosovë

Një grua në Fushë Kosovë është arrestuar pasi që dyshohet se i ka dëmtuar disa vetura sot në mëngjes.

Lajmin për portalin rtv21.tv e ka konfirmuar zëdhënësja e Policisë së Kosovës, Flora Ahmeti.

Sipas Ahmetit, e dyshuara ka dëmtuar tri vetura në rrugën “Xhemajl Mustafa”.

Pasi është arrestuar nga Policia, e dyshuara është dërguar në Qendrën Klinike Universitare të Kosovës për trajtim mjekësor, pasi thuhet se është lënduar dhe ekzaminim psikiatrik.

“Rreth orës 10:00, kemi pranuar informatën për dëmtimin e tri automjeteve në rrugën Xhemajl Mustafa në Fushë Kosovë. Policia menjëherë ka arrestuar personin e dyshuar, e cila është dërguar në QKUK, për trajtim mjekësor ( është lënduar) dhe ekzaminim psikiatrik”, ka thënë Ahmeti për rtv21.tv.

Ahmeti ka njoftuar se ndaj të dyshuarës B. M., është hapur rast për veprën penale “Asgjësimi apo dëmtimi i pasurisë”.

“Pas përfundimit të trajtimit mjekësor, do të kryhen procedurat e nevojshme hetimore në koordinim me prokurorinë”, ka thënë Ahmeti./21Media