Polonia do t’i dërgojë Ukrainës katër avionë luftarakë MiG-29

Polonia do të dërgojë katër avionë luftarakë të epokës sovjetike Mig në Ukrainë, duke u bërë vendi i parë i NATO-s që dërgon avionë që nga pushtimi i Rusisë vitin e kaluar.

Presidenti polak, Andrzej Duda tha se ata do të dërgohen në ditët në vijim, ndërsa të tjerët do të dorëzohen në të ardhmen.

Megjithëse një nxitje e mirëpritur për mbrojtjen ajrore të Ukrainës, avionët shtesë nuk pritet të jenë vendimtarë në luftë.

Zëvendëskryetarja e parlamentit të Ukrainës, Olena Kondratyuk tha se shpreson që më shumë vende të pasojnë.

Vende të tjera të NATO-s po shqyrtojnë dërgimin e avionëve të epokës sovjetike, me të cilët pilotët ukrainas janë trajnuar për të fluturuar.

Ukraina u ka kërkuar më parë vendeve perëndimore avionë luftarakë modernë, si F-16.

Mbretëria e Bashkuar po trajnon pilotët ukrainas në avionë të standardeve të NATO-s. Por për shkak të kohërave të gjata të trajnimit, ajo ka paralajmëruar se furnizimi me avionë perëndimor do të ishte vetëm një opsion afatgjatë.

Presidenti Biden ka përjashtuar më parë dërgimin e avionëve nga SHBA në Ukrainë.

Në fillim të pushtimit të plotë të Rusisë, Ukraina besohej se kishte rreth 120 avionë të aftë luftarakë – kryesisht Mig-29 dhe Su-27 të vjetëruar.

Presidenti Duda tha se Polonia kishte ende rreth një duzinë avionësh Mig 29 të epokës sovjetike në veprim.

Polonia është një aleat i fortë i Ukrainës, një nga furnizuesit më të mëdhenj të pajisjeve ushtarake. Aktualisht po zëvendëson avionët e vjetër të epokës sovjetike me modele më të reja amerikane dhe koreane./21Media