Presidenti austriak shpreson të gjendet një zgjidhje e qëndrueshme që çon në normalizimin e marrëdhënieve Kosovë -Serbi
Presidenti i Austrisë, Alexander Van der ia ka shprehur mbështetjen për rrugën drejt integrimit evropian.
Van der Bellen ia ka dërguar një letër urimi presidentes së Kosovës, Vjosa Osmani me rastin e 16-vjetorit të pavarësisë, nëpërmjet të cilës po ashtu përmendi bashkëpunimin për rritjen e stabilitetit, ndërsa tha se shpresojnë që së shpejti të gjendet një zgjidhje e qëndrueshme për normalizimin e marrëdhënieve ndërmjet Kosovës dhe Serbisë.
“E nderuara zonja Presidente, me rastin e Festës Kombëtare të Republikës së Kosovës, kam kënaqësi të madhe t’ju përcjell urimet e mia më të ngrohta. Austria dhe Kosova kanë marrëdhënie të shkëlqyera dypalëshe. Duke pasur parasysh shkëmbimet politike, ekonomike, shkencore dhe kulturore, nuk është çudi që ne shohim sot praninë e një diaspore të gjallë nga vendi juaj në Austri. Austria dhe Kosova ndajnë të njëjtat vlera europiane dhe janë të një mendjeje në një mori çështjesh. Në rrethanat aktuale gjeopolitike, veçanërisht në sfondin e një lufte të tmerrshme agresioni të zhvilluar nga Rusia kundër Ukrainës, ne qëndrojmë së bashku si një familje europiane. Duke qenë se konflikti ka pasoja të rënda edhe në rajonin e Ballkanit Perëndimor, është në interesin tonë të përbashkët të bashkëpunojmë ngushtë për ta rritur stabilitetin”, thuhet në letrën e presidentit austriak.
“Më lejoni t’ju siguroj se Austria do të vazhdojë t’ju mbështesë në rrugën tuaj drejt integrimit evropian. Në këtë kontekst, ne shpresojmë që së shpejti të gjendet një zgjidhje e qëndrueshme dhe funksionale që çon në normalizimin e marrëdhënieve tuaja me fqinjin tuaj”, shton Van der Bellen.
Osmani pranon telegrame urimi nga liderë botëror për 16 vjetorin e Pavarësisë
Për nder të 16 vjetorit të Pavarësisë së Republikës së Kosovës, krahas letrave të shteteve të QUNIT-it, Shqipërisë dhe Turqisë, tanimë të publikuara, Presidentja e Republikës së Kosovës ka pranuar letra urimi edhe nga liderë të ndryshëm botëror.
Sipas një komunikate të Presidencës, Osmani mori urime nga presidenti i Austrisë, mbreti i Belgjikës, presidenti i Emirateve të Bashkuara Arabe, Estonisë dhe të tjerë.
Presidenti i Austrisë, Alexander Van der Bellen
Guvernatori i Përgjithshëm i Australisë, David Hurley
Mbreti Philippe i Belgjikës
Presidenti i Bullgarisë, Rumen Radev
Presidenti i Emirateve të Bashkuara Arabe, Sheikh Mohamed bin Zayed Al Nahyan
Presidenti i Estonisë, Alar Karis
Guvernatorja e Përgjithshme e Kanadasë, Mary Simon
Presidenti i Kroacisë, Zoran Milanović
Mbreti Willem-Alexander i Holandës
Presidentja e Hungarisë, Katalin Novak
Emiri i Katarit, Sheikh Tamim bin Hamad Al Thani
Emiri i Kuvajtit, Mishal Al-Ahmad Al-Jaber Al-Sabah
Presidenti i Maqedonisë së Veriut, Stevo Pendarovski
Presidenti i Maldiveve, Mohamed Muizzu
Princi Albert II i Monakos
Mbreti i Arabisë Saudite, Salman of Saudi Arabia
Kapitenët Regjent të San Marinos, Filippo Tamagnini dhe Gaetano Troina
Presidenti i Senegalit, Macky Sall
Presidentja e Sllovenisë, Nataša Pirc Musar
Presidentja e Zvicrës, Viola Amherd
Sekretarja e Përgjithshme e Org. Ndërkombëtare të Frankofonisë, Louise Mushikiwabo