Prezantohen reformat në sistemin e drejtësisë së Kosovës dhe Shqipërisë

Një delegacion i Këshillit të Lartë të Drejtësisë së Shqipërisë vizitoi Këshillin Prokurorial të Kosovës

Kryesuesi i Këshillit Prokurorial të Kosovës (KPK), Blerim Isufaj, ka pritur në takim një delegacion të Këshillit të Lartë të Drejtësisë së Shqipërisë, të kryesuar nga Gjin Gjoni, anëtar i këtij këshilli. Në këtë takim të  pranishëm ishin  edhe zëvendës kryeprokurorja e Shtetit, Sevdije Morina dhe kryesuesi i Këshillit Gjyqësor të Kosovës, Nehat Idrizi.

Në fillim të takimit, Isufaj ka njoftuar mysafirët me funksionimin e sistemit prokurorial të Kosovës, në veçanti me riorganizimin e bërë në këtë sistem. Ai tha se me ndryshimet e fundi ligjore sistemi prokurorial i Kosovës ka strukturë të re organizative dhe funksionale.

Në anën tjetër, anëtari i Këshillit të Lartë të Drejtësisë së Shqipërisë, Gjin Gjoni, prezantoi reformat që janë duke u bërë në sistemin e drejtësisë së Republikës së Shqipërisë.

Të dy bashkëbiseduesit folën edhe për bashkëpunimin e deritashëm dhe mundësitë për ngritje të këtij bashkëpunimit ndër shtetëror në sistemet e drejtësisë se dy vendeve.

Ata vlerësuan bashkëpunimin e deritashëm, ndërsa vënë theksin në ato fusha ku dy shtetet mund të ngrisin bashkëpunimin dhe shkëmbejnë përvojat e tyre, me qëllim të ngritjes së efikasitetit të dy sistemeve./21Media