Prishtina prin me numrin më të madh të rasteve me tuberkuloz

Në vitin 2021, në Kosovë janë regjistruar gjithsej 447 raste të pacientëve të sëmurë nga tuberkulozi ose me incidencë rreth 25 në 100 mijë banorë.
Ministria e Shëndetësisë thotë se duke qenë se ka edhe numrin më të madh të banorëve, Prishtina prin me 178 raste të kësaj sëmundje.
“Gjithashtu, kemi më shumë prekje të grup-moshave mbi 65 vjeçe dhe po ashtu një numër më të madh të pacientëve meshkuj”, thotë MSH-ja.
Pandemia ka ndikuar negativisht në sëmundjen e tuberkulozit dhe tek pacientët, në qasjen e tyre në shërbime shëndetësore, pamundësinë për t’ju afruar diagnostikën laboratorike të duhur për këto dy vjet, pamundësinë e ndjekjes së trajtimit të tyre përgjatë periudhës 6-9 mujore, pa përmendur ndikimin social dhe ekonomik të pandemisë.
“Investimet në sëmundjen e TB-së në periudhën (2019-2021) janë fokusuar në trajtimin e TB-së, zbulimin dhe diagnostikimin e rasteve të TB-së, zbulimin e rasteve MDR-TB, diagnostikimin dhe trajtimin e MDR-së dhe mirëmbajtjen e infrastrukturës së objekteve të TB-së. Janë bërë investime të konsiderueshme në prokurimin e barnave kundër tuberkulozit 100% barna të linjës së parë dhe 100% barna të linjës së dytë për TB, 100% mediume të ngurta dhe të lëngshme për diagnostikimin e TB. Edhe gjate viteve te ardhshme 2022-2024 do të vazhdojë përkrahja dhe ndihma nga partneri dhe donator kryesor i TB , Fondi Global per TB, HIV dhe Malarie. Ministria e Shëndetësisë mbetet e përkushtuar në arritjen e vizionit për një Kosovë pa TB! Vit pas viti në arritjen e këtij vizioni do të rriten investimet në shërbimet shëndetësore dhe përkrahja për pacientet me TB!. Për të arritur “Një Kosovë pa TB”!”, thotë MSH-ja.
Më 24 mars shënohet Dita Botërore e Tuberkulozit, për të rritur ndërgjegjësimin e publikut për pasojat shkatërruese shëndetësore, sociale dhe ekonomike të sëmundjes së tuberkulozit dhe për të rritur përpjekjet për t’i dhënë fund epidemisë globale të TB-së.