Prokuroria do të hetojë rastin e 13-vjeçares që u bë nënë

Dyshohet se edhe babai i foshnjës është mitur

Lindja e një foshnje nga nëna e mitur 13-vjeçare, po konsiderohet se përbën bazë të mjaftueshme për të hapur rast në prokurori. Madje, edhe Prokuroria e Shtetit pritet së shpejti të nisë hetimet lidhur me rastin.

E mitura që solli në jetë foshnjën, është shtetase e Shqipërisë ndërsa jeton në Gjakovë. Ajo në Kliniken e Gjinekologjisë deklaroi se është e martuar, madje tha se edhe babai i foshnjës është i mitur.

Drejtoresha e Klinikës Gjinekologjike, Mirvete Paçarada, bëri të ditur për se nëna gëzon shëndet të plotë dhe se fëmijën e ka sjellë në jetë në javën e 33 të shtatzënisë. Ndërkaq, drejtori i Klinikës së Neonatologjisë, Xhevdet Gojnovci,  tha se lindja ka ndodhur ditën e hënë, në ora 10:15 minuta. Aktualisht për shkak që foshnja lindi para kohe, ajo gjendet në inkubator, por që është me shenja vitale stabile.

Avokati Florian Dushi tha se Prokuroria e Shtetit duhet të fillojë hetimet për rastin, pasi sipas tij vetë publikimi i lajmit se një e mitur është bërë nënë, përbën bazë të mjaftueshme për hetime.

Sipas informacioneve nga Klinika Gjinekologjike, edhe babai i foshnjës është i mitur, e për këtë Dushi tregon se a ka dispozita ligjore që e dënon nëse konstatohet se babai është i moshës madhore.

Nga Prokuroria e Shtetit, Prokurori Ibrahim Berisha, bëri të ditur për kp se gjithsesi do të ketë hetim.

“Ne jemi ende në diskutim e sipër. Është rast pak më specifik, sepse kur janë të miturit në pyetje, ne jemi të kujdesshëm. Ne duhet të fillojmë hetimin gjithqysh. Pasoja është shkaktuar te ne këtu, të shohim a po fillojmë ne apo Gjakova. Por, sipas të gjitha gjasave, edhe ne mund të fillojmë. Por, gjithsesi fillojmë për arsye se nën moshën 16-vjeçare kushdo që kryen ndonjë akt seksual, e këtu në pyetje është që ajo ka lindur, aty pa dyshim ne do të hapim rast”, tha ai