Rama flet për arrestimet në Komunë: Kontratat mbi vepër janë të nevojshme
(Lajm i përditësuar)
Kryetari i Prishtinës, Përparim Rama foli sot për arrestimet që ndodhën javën e kaluar në Komunën e Prishtinës, ku tha se të njëjtit janë ndaluar për arsye të kontratave mbi vepër.
Sipas tij, në këtë rast s’ka pasur asgjë jashtë normales, pasi kontratat mbi vepër janë të nevojshme për shkak të shërbimeve të shumta që kryeqyteti ofron.
“Unë e kuptova këtë sa isha jashtë vendit dhe e pash që i kanë marrë në pyetje nënkryetarin dhe shefin e personelit. Siç e mora vesh në pyetje çështja e kontratave mbi vepër, siç e dini ju kryeqyteti funksionon në një buxhet të një densiteti të 180 mijë banorëve, pra në të dhëna të vitit 2011, pra jemi 12 vjet prapa. Kryeqytetit i kërkohen shërbime të shumta dhe këto kontrata mbi vepër janë të ndërlidhura qysh përpara në shërbime në aspektin e administratës, shëndetësisë dhe inspektoratit. Pra janë të nevojshëm pasi numrat që i kemi ne nuk janë të mjaftueshëm për të kryer shërbime në kryeqytet. Besoj se ajo çka ka ndodhur është jashtë proporcioneve, nuk e shoh si të arsyeshme, por po ia lëmë proceseve ligjore të merren me këto punë. Nuk e shoh se ka pasur asgjë jashtë normales”, theksoi Rama.
Lojërat Mesdhetare “Prishtina 2030”, Rama premton ndërtimin e ambienteve të reja sportive
Kryetari i Komunës së Prishtinës, Përparim Rama ka premtuar ambiente të reja sportive në kryeqytet për Lojërat Mesdhetare “Prishtina 2030”.
Rama tha se organizimi i lojërave mesdhetare në Kosovë është një fitore e të gjithëve, derisa tha se kjo ngjarje do t’ia hap një derë të madhe të gjithë sportit në vend.
“Ne do të optimizojmë infrastrukturën ekzistuese dhe në mënyrë strategjike do të shtojmë objekte të reja. Po, do të ndërtojmë ambiente të reja sportive se angazhimi ynë shtrihet edhe përtej këtyre lojërave. Do të ndërtojmë stadiumin olimpik të premtuar me të gjithë qendrën sportive, me qëllimin që të krijojmë një trashëgimi të qëndrueshme infrastrukturore që do të gëzojmë edhe përtej vet ngjarjes në shërbim të fuqizimit të atletëve tanë. Kanë mundësi që të shkëlqejnë kudo në arenat sportive ndërkombëtare. Për më tej do të shfrytëzojmë potencialin e stadiumeve dhe të palestrave ekzistuese në të paktën 10 komuna të ndryshme të Kosovës”, tha ai.
Në konferencë për media nga aeroporti “Adem Jashari” në kryeqytet, Rama tha se Lojërat Mesdhetare “Prishtina 2030” do të jenë ngjarja më e madhe ndërkombëtare që pritet të zhvillohet në Kosovë.
“Për herë të parë një qytet jo bregdetar, Prishtina jonë bëhet mikpritëse. Do të jetë kjo hera e parë në histori të Lojërave Mesdhetare ku do t’i bashkojnë forcat dy shtete, disiplina e lundrimit thelbësore në lojërat mesdhetare do të luhet në brigjet e Durrësit. Ky partneritet strategjik me vëllezërit tanë në Shqipëri e krijon një platformë barazie për të gjitha vendet pjesëmarrëse. Përmes tij synojmë t’i frymëzojmë të tjerët përtej kufijve dhe me përqafu frymën e bashkëpunimit sportiv që nuk njeh asnjë kufij. Rëndësia historike e edicionit të 21-të lojërave mesdhetare shkon përtej këtyre risive, ato do të jenë ngjarja më e madhe ndërkombëtare që pritet të zhvillohet brenda vendit tonë qysh prej pavarësisë e këndej. Kjo ngjarje do t’ia hap një derë të madhe të gjithë sportit kosovarë duke i mundësuar më tej çdo federate me qenë nikoqire e ngjarjeve ndërkombëtare në disiplinën përkatëse”, shtoi Rama.