Rama: Shqipëria do ta mbështesë Kosovën për anëtarësim në KE

Kryeministri i Shqipërisë, Edi Rama duke folur për marrëdhëniet Kosovë -Serbi, ka thënë se Shqipëria do të mbështesë Kosovën në rast aplikimi në Këshillin e Evropës.
“Ne jemi në mbështetje absolute të Kosovës në çdo hap dhe për çdo gjë që lidh Shqipërinë, Kosovën dhe komunitetin ndërkombëtar. Ndërkohë që ne kemi qasje komplet tjetër kur vjen puna tek normalizimi i marrëdhënieve hap pas hapi në aspektin ekonomik, në aspektin e lirisë së lëvizjes e të tjera e të tjera, me Serbinë paralelisht me betejën në tryezë, betejën diplomatike për dialog e kështu me radhë sepse besojmë që kjo është rruga, kjo është rruga dhe nga ana tjetër respektojmë plotësisht zgjedhjen e bërë nga autoritetet legjitime, të votuara, të mandatuara, përgjegjëse të Kosovës për të pasur një qasje komplet tjetër në këtë aspekt. Por kur vjen puna tek demarshet e Kosovës në arenën ndërkombëtare, ne jemi 100% me Kosovën. Serbia sigurisht është në të drejtën e vetë të mendojë krejt ndryshe, na vjen keq për Serbinë në këtë rast, por ne do të mbështesim Kosovën.”, ka deklaruar Rama pas darkës me Borrell.
Siç raportojnë mediat në Shqipëri, Rama po ashtu ka thënë se pritet që edhe Mali i Zi të bëhet pjesë e Nismës “Ballkani i Hapur”./21Media