Reagon AAK-ja për pagat: Po shtypen ata që mendojnë ndryshe

Aleanca për Ardhmërinë e Kosovës e ka quajtur “skandaloz” vendimin e qeverisë për mosekzekutimin e pagave për mësimdhënësit.
“Vendimi i qeverisë për të penalizuar mësimdhënësit grevistë është të paktën skandaloz. Duke shkelur të gjitha ligjet në fuqi, qeveria e mashtrimit, gënjeshtrës, injorancës dhe arrogancës, përpos sjelljeve të panatyrshme për një qeveri gjatë grevës, ajo ka vazhduar me ndëshkimin e atyre që nuk mendojnë si ajo”, thuhet në komunikatë.
Ky subjekt politik thotë se “shtypja e atyre që mendojnë ndryshe, është cilësi e regjimeve autokratike e diktatoriale”.
AAK ka akuzuar qeverinë se po “kërkon armiq të brendshëm”.
“Qeveria e cila nuk ka realizuar as 5% të planit të punës e as 3% të investimeve kapitale, po kërkon armiq të brendshëm, te sindikata e opozita, te mësimdhënësit, personeli shëndetësor, administrata publike, Policia e zjarrfikësit”, thuhet tutje në komunikatë.
AAK-ja ka deklaruar se do t’i përkrahin mësimdhënësit grevistë.
“Mësimdhënësit grevistë, e kanë përkrahjen tonë dhe zotimin tonë që nuk do të ndalemi së kundërshtuari këtë vendim jonjerëzor, e nëse në këtë mandat nuk do të kemi mundësi e numra që të ndryshojmë diçka për të mirën e tyre, atëherë qeverisja e ardhshme e Aleancës, do të kompensojë secilin, ashtu siç kemi kompensuar gjatë mandatit tonë edhe mësuesit e viteve ’90të”.
Zëdhënësi i Qeverisë së Kosovës, Përparim Kryeziu ka thënë për portalin rtv21.tv se pagat në sektorin publik janë ekzekutuar për zyrtarët që kanë dalë në punë dhe kanë kryer detyrat dhe përgjegjësitë e tyre./21Media