Rrugët në Brezovicë të kalueshme

MIT arsyeton kolonat e gjata të automjeteve

Ministria e Infrastrukturës dhe Transportit ka njoftuar se rruga në Brezovicë deri tek qendra e skijimit është pastruar vazhdimisht nga bora dhe nuk është bllokuar asnjëherë për qarkullim të automjeteve si pasojë e reshjeve.

“Kompania përgjegjëse dhe zyrtarë të MIT janë në monitorim të kësaj zone, njëjtë sikur edhe të të gjitha rrugëve regjionale, nacionale dhe autostradave”, bëhet e ditur në një njoftim për medie.

Ministria e Infrastrukturës përmes njoftimit i ka arsyetuar kolonat e gjata të automjetëve në këtë rrugë.

“Arsyeja e kolonës së automjeteve në këtë rrugë është mungesa e parkingjeve pas fluksit të madh të qytetarëve, që të shtunën ia kanë mësyrë këtij vendi turistik. Prandaj edhe Policia e Kosovës gjendet aty për të drejtuar komunikacionin e dendur”, bëhet e ditur në noftim.

Ministri i Infrastrukturës dhe Transportit, Pal Lekaj kërkon nga qytetarët që përkundër rrugëve të pastruara të kenë kujdes në vozitje, veçanërisht në zonat malore dhe të mos lëvizin pa pajisje dimërore me qëllim të evitimit të aksidenteve./21Media