Rusia dëbon 40 diplomatë gjermanë 

Ministria e Jashtme e Rusisë ka dëbuar 40 diplomatë gjermanë vetëm disa javë pasi Berlini njoftoi vendimin për të dëbuar të njëjtin numër të stafit diplomatik rus.
Në një deklaratë, ministria tha se kishte marrë vendimin për të shpallur stafin si “persona non grata” pasi Gjermania shpalli “të padëshirueshëm” një “numër të konsiderueshëm” zyrtarësh në ambasadën ruse në Berlin.
Në fillim të këtij muaji, Ministria e Jashtme e Gjermanisë njoftoi vendimin e saj për të dëbuar 40 diplomatë rusë pasi Moska po përballet me akuza për krime lufte.
Ministrja e Jashtme e vendit, Annalena Baerbock ka thënë se imazhet e marra nga qyteti ukrainas Bucha, i cili ndodhet në veriperëndim të kryeqytetit, treguan “një synim për të shkatërruar që shkon përtej të gjithë kufijve”, përpara se të shtonte se masat e mëtejshme me partnerët po përgatiteshin.
Disa vende të tjera të BE-së, duke përfshirë Lituaninë, Letoninë, Estoninë, Bullgarinë, Poloninë, Sllovakinë dhe Republikën Çeke, gjithashtu kërkuan që diplomatët rusë të largoheshin nga vendet e tyre./21Media