Sekuestrohen 1 mijë e 704 euro të falsifikuara, arrestohen dy të dyshuar në Prizren

Hetuesit policorë nga Njësia Rajonale për Hetimin e Krimeve Ekonomike dhe Korrupsionit – Prizren, kanë trajtuar një informatë nën dyshimin se dy persona janë të përfshirë në veprën penale ‘falsifikimit i parasë’, respektivisht shpërndarjen e parasë së falsifikuar.

Pas pranimit te informatës janë ndërmarrë veprime hetimore në koordinim me Prokurorinë e Shtetit dhe me patrullat policore të Stacionit Policor Prizren, sot, në rrugën magjistrale Prizren-Vërmicë janë ndaluar dy automjete, me të cilat dyshohej se po bëhej shpërndarja e parasë së falsifikuar.

Në njoftimin e Policisë së Kosovës bëhet e ditur se “pas kontrollit të automjeteve, në automjetin e parë janë gjetur: monedha në sasi prej 850 x  2 = 1700 euro. Ndërsa në automjetin e dytë janë gjetur: Monedha në sasi prej 2 X 2=4 euro, një kallëp metalik rrethor i zbrazët i monedhës metalike dy euro (shabllon), pesë copa te vogla metalike rrethore të monedhës dy euro (shabllone) dhe katër telefona mobil. Totali i parave të sekuestruara është: 1704 euro monedha metalike (nga dy euro)”.

Me urdhër të prokurorit janë kontrolluar dy shtëpi, pronë e të dyshuarve: B.D. dhe T.K., të njëjtit janë intervistuar në prezencë të avokatëve mbrojtës. Të dyshuarit me aktvendim të prokurorit janë ndaluar për 48 orë./21Media