Dy sfidat kryesore me të cilat po vazhdojnë të përballen gratë e Kosovës, janë ritmi i ngadalshëm i zbatimit të ligjit dhe prania e dhunës ne familje. Gratë janë shumë pak të përfshira në sferën publike, e shumë prej tyre kanë mbetur pa punë gjatë kohës së pandemisë. Organizatat për barazi gjinore kërkojnë përfaqësimin e tyre në tryezën e negociatave. Kështu u tha në takimin konsultativ me temë “Fuqizimi ekonomik si parakusht i parandalimit të dhunës në familje dhe dhunës në baza gjinore” të organizuar nga Agjencia për Barazi Gjinore në kuadër të Zyrës së Kryeministrit në bashkëpunim me Qendrën Kosovare për Studime Gjinore.

Drejtoresha e Qendrës Kosovare për Studime Gjinore, Luljeta Demolli tha se ky vit shënon 20-vjetorin e rezolutës 13/25. Ajo ka theksuar se shumë gra kanë mbetur pa punë gjatë kohës së pandemisë Covid-19.

“Ne duhet të identifikojmë sfidat e reja që na kanë mbetur në këtë luftë. Ne sjellim dy sfida kryesore, ritmin e ngadalshëm të zbatimit të ligjit dhe rritjen e numrit të rasteve të dhunës. Përpos adresimit të dhunës ndaj grave duhet të reflektojnë edhe në fuqizim ekonomik. Gratë nuk janë të përfaqësuara në sferën publike, dhe sfidë është përhapja e pandemisë Covid-19. Shumë gra kanë mbetur pa punë dhe i kanë mbyllur bizneset e tyre. Ne dëshirojmë që gratë të jenë në tryezat e negociatave dhe paqes”, ka shtuar ajo.

Ndërsa, kryeministri i Kosovës, Avdullah Hoti theksoi se ka avancimi në agjendën për barazi gjinore, megjithatë pohoi se gjendja në terren e grave në përgjithësi nuk është e mirë.

“Besoj që si shoqëri kemi avancuar mjaft në promovimin dhe nivelizimin për barazi gjinore. Gjendja në terren nuk e reflekton këtë vetëdijesim shoqëror që kemi sepse paraqitjet e anktheve dhe dhunës së grave tregon që ka ende shumë punë për t’u bërë. Jemi afër arritjes së objektivit. Mundem t’ju garantoj qe gjatë qeverisjes sonë do të keni mbështetjen e plotë që të promovojmë agjendën për barazi gjinore”, theksoi Hoti.

Ambasadorja e Suedisë në Kosovë, Karin Hernmarck Ahliny ka përmendur rastet e viktimave të dhunës, për çka tha se të njëjtat ndjehen më të turpëruara se vet ata qe ushtrojnë dhunë.

“Fuqizimi ekonomik nënkupton shansin për t’u larguar kur nuk jeni duke u trajtuar si qenie njerëzore”, tha ajo.

Kryetarja e Komisionit për Barazi Gjinore, Teuta Haxhiu theksoi se mbështetja e grave sipërmarrëse duhet të jetë prioritet i qeverisë.