Stoltenberg: Nuk ka ndryshim të pranisë së NATO-s në Kosovë

 

Sekretari i përgjithshëm i NATO-s, Jens Stoltenberg sot tha se nuk do të ketë asnjë ndryshim në misionin ushtarak të Aleancës në Kosovë dhe se mbështet plotësisht procesin e normalizimit të marrëdhënieve midis Prishtinës dhe Beogradit.

Ai vuri në dukje sot në një bisedë me presidentin serb, Aleksandër Vuçiq në Bruksel se Aleanca është e përkushtuar për paqen dhe stabilitetin në Ballkanin Perëndimor përmes misionit paqeruajtës KFOR.

“Kam pasur një bisedë të mirë me presidentin e Serbisë, Aleksandar Vuçiq, rreth sfidave të sigurisë në Ballkanin Perëndimor. NATO është e përkushtuar për paqe dhe stabilitet në Ballkanin Perëndimor përmes misionit KFOR”, shkroi Stoltenberg në Twitter.

Ai u bëri thirrje të gjitha palëve që të angazhohen në dialog midis Beogradit dhe Prishtinës në mënyrë që të gjejnë një zgjidhje paqësore.

Një deklaratë e postuar në faqen e internetit të NATO-s tha se bashkëbiseduesit diskutuan mbi partneritetin midis Aleancës dhe Serbisë, rolin e NATO-s në ruajtjen e stabilitetit në Ballkanin Perëndimor dhe situatën e sigurisë në rajon.

Stoltenberg shtoi se NATO ka qenë e angazhuar për paqe dhe stabilitet në Ballkanin Perëndimor për dekada dhe se do të vazhdojë në këtë rrugë.

“Misioni ynë KFOR është shembulli më i qartë i këtij angazhimi”, nënvizoi Stoltenberg.

Sipas tij, KFOR siguron një mjedis të sigurt dhe garanton lirinë e lëvizjes për të gjitha komunitetet në Kosovë.

Stoltenberg gjithashtu tha se NATO mbështet plotësisht procesin e normalizimit të marrëdhënieve midis Beogradit dhe Prishtinës.

“Dialogu midis Beogradit dhe Prishtinës është platforma më e mirë për gjetjen e një zgjidhjeje që do të respektojë të drejtat e të gjitha komuniteteve dhe do të ndërtojë paqe të qëndrueshme që do të sigurojë një të ardhme më të mirë dhe më të prosperuar për të gjithë. Dialogu konstruktiv është çelësi për stabilitetin e rajonit dhe unë vazhdoj t’u bëj thirrje të gjitha palëve që të përfshihen në dialog”, u shpreh ai.

Stoltenberg theksoi se nuk do të ketë asnjë ndryshim në misionin KFOR, i cili numëron rreth 3.500 trupa dhe u krijua në vitin 1999, raporton Reuters.

“Aleatët e NATO-s janë të përkushtuar në mënyrë të vendosur për KFOR dhe për misionin e tij të rëndësishëm”, tha Stoltenberg dhe shtoi se trupat e NATO-s janë në Kosovë për të mbrojtur të gjitha komunitetet dhe për të siguruar lirinë e lëvizjes.