Stoltenberg: Prioriteti i NATO-s është ta ndihmojë Ukrainën në luftën kundër Rusisë

Sekretari i Përgjithshëm i NATO-s, Jens Stoltenberg, ka thënë se prioriteti i aleancës ushtarake është të ndihmojë Ukrainën në luftën e saj kundër Rusisë, përcjell rtv21.tv.

“Ne duhet të forcojmë pozicionin e Ukrainës në fushën e betejës në mënyrë që rezultati i kësaj lufte të sigurojë që Ukraina të mbizotërojë si një komb sovran i pavarur dhe që presidenti Putin të mos fitojë”, tha gjatë një podkasti të drejtpërdrejtë me ambasadorin e Shteteve të Bashkuara në NATO, Julianne Smith.

“Ajo që ne dimë është se ukrainasit kanë tani aftësi, armë, municione dhe gjithashtu trajnime, të ofruara nga aleatët dhe partnerët e NATO-s”, shtoi Stoltenberg, duke vënë në dukje se Kievi ka aftësitë që i nevojiten për të çliruar më shumë tokë.

Ndërkohë, zëdhënësja e ministrisë së Jashtme ruse, Maria Zakharova, ka thënë se nëse Perëndimi furnizon Ukrainën me armë bërthamore, kjo do të çonte në fundin e njerëzimit.

“Nëse ata duan një kolaps global, të pakthyeshëm, atëherë ata do ta bëjnë atë [të dërgojnë armë bërthamore në Ukrainë]. Ju mund të shihni se çfarë po ndodh. Regjimi i Kievit është gati të shkatërrojë tokën e vet… Ata janë gati ta infektojnë me uranium të varfrit, t’i përmbytin me ujë, t’i helmojnë me amoniak” tha ajo.

Zakharova tha se presidenti ukrainas Volodymyr Zelenskyy dhe ekipi i tij po kthehen në “një organizatë terroriste ndërkombëtare”, raporton AlJazeera.

“Kjo është një celulë e vërtetë terroriste dhe ndërkombëtare, sepse ka instruktorë të huaj, mercenarë të huaj, ata janë të lidhur me tregun e zi të armëve, trafikimin e paligjshëm të parave, njerëzve, shitjet ilegale të pjesëve të trupit – gjithë grupi që karakterizon terrorizmin ndërkombëtar”, shtoi ajo.