Sulmohen me gurë një gazetar dhe një kameraman në Zveçan
Një gazetar dhe një kameraman janë sulmuar me gurë nga persona të maskuar në Zveçan, përderisa gjendeshin në veturë.
Asociacioni i Gazetarëve të Kosovës ka reaguar për këtë sulm, duke i bërë thirrje Policisë së Kosovës dhe KFOR-it që të krijohen kushte më të mira për mediat.
“Në Zveçan është sulmuar me gurë ekipi i ATV-së, i përbërë nga gazetari Fatlum Jashari, kameramani Blend Thaçi, si dhe shoferi, Enis Sherifi, përderisa po përcillnin zhvillimet e fundit në këtë komunë. Sipas mediumit, disa persona të maskuar, e kanë sulmuar me gurë veturën derisa ishte në lëvizje, e që si pasojë lëndime të lehta trupore kanë marrë gazetari Fatlum Jashari dhe kameramani Blend Thaçi, si dhe iu janë thyer xhamat veturës. Asociacioni i Gazetarëve të Kosovës vazhdon të jetë i shqetësuar për ekipet e medieve që po raportojnë nga veriu i vendit, andaj ju bëjmë thirrje Policisë së Kosovës, dhe prezencës ndërkombëtare atje të krijojnë kushte më të mira për ta”, thuhet në komunikatën e AGK-së.
Ekipi i lënduar më pas ka arritur të largohet nën përcjellje të EULEX-it.
Tensionet në veri janë ringritur sot, pasi Policia e Kosovës arrestoi një nga organizatorët kryesorë të protestave të dhunshme që filluan para dy javësh, Milun Milenkovic- Llune. Gjatë arrestimit të tij, një pjesëtar i Policisë së Kosovës u lëndua lehtë, ndërkohë që edhe dy pjesëtarë të tjerë u lënduan pasi hasën në rezistencë nga serbët lokalë. /21Media
Dëshiron ta dëgjosh këtë lajm me zë?