Takim i jashtëzakonshëm i Agjencisë Evropiane të Barnave për AstraZenecan

 

Agjencia Evropiane e Barnave (EMA) njoftoi sot se do të mbajë një “takim të jashtëzakonshëm” të enjten, pasi disa vende ndaluan përdorimin e vaksinës AstraZeneca për shkak të frikës pas incidenteve në lidhje me mpiksjen e gjakut.

“Komiteti i Sigurisë EMA do të studiojë informacionin me më shumë kujdes të martën dhe do të mbledhë një sesion të jashtëzakonshëm të enjten, më 18 mars, për të nxjerrë konkluzione nga informacioni i mbledhur dhe për të propozuar masa të tjera të nevojshme”, u bë e ditur në deklaratën e agjencisë evropiane me seli në Amsterdam.

Ditët e fundit, disa vende, duke përfshirë Italinë, Francën dhe Gjermaninë dhe sot Sllovenia vendosën, si një masë paraprake, të pezullojnë përdorimin e vaksinave nga laboratori suedez-britanik, AstraZeneca dhe Universiteti i Oxsfordit pas dyshimeve për efekte anësore të mundshme deri në mpiksjen e gjakut.

EMA ka deklaruar më parë se po heton një “numër të caktuar” të rasteve të mpiksjes së gjakut te njerëzit që kanë marrë vaksinën, duke deklaruar se ajo ende mund të përdoret dhe se përfitimet e këtyre vaksinave ende tejkalojnë rreziqet.

“Ndërsa hetimi vazhdon, EMA pohon se përfitimet e vaksinës AstraZeneca në parandalimin e COVID-19, e cila sjell me vete rrezikun e shtrimit në spital dhe vdekjen, tejkalojnë rrezikun e efekteve anësore”, bëri të ditur EMA.

Gjermania pezulloi përkohësisht imunizimin me vaksinën AstraZeneca pasi zbuloi shtatë raste të trombozës te njerëzit që morën vaksinën, tha sot ministri i Shëndetësisë Jens Spahn dhe shtoi se bëhet fjalë për shtatë raste nga një total prej 1.6 milionë njerëzve të vaksinuar me AstraZeneca në vend.