Thatësira godet lumin Rhine të Gjermanisë, “Na kanë mbetur 30 cm ujë”
Ndërsa Evropa po jeton një verë të gjatë dhe të nxehtë, një nga lumenjtë kryesorë të kontinentit po bëhet më i thatë, duke paraqitur probleme të mëdha për njerëzit dhe bizneset që mbështeten në të.
Disa shërbime tragetesh në dhe rreth qytetit të Kaub, ku ndodhet lumi Rhine, janë detyruar të ndalojnë.
“Ne kemi 1.5 metra ujë dhe varka jonë është 1.20 metra e thellë. Pra, kemi 30 centimetra ujë të mbetur poshtë nesh”, tha kapiteni Andre Kimpel, përcjell rtv21.tv
Nuk është e pazakontë që nivelet e ujit të bien këtu, por kapiteni Kimpel thotë se kjo po ndodh shpesh tashmë.
“Dikur kemi pasur shumë përmbytje. Tani kemi shumë ujëra të ulëta”, shtoi ai.
Në bregun e lumit aty pranë, ka një stacion të vjetër matës. Çdo kapiten që dëshiron të hyjë në Rhine do t’i referohet nivelit zyrtar të ujit të regjistruar këtu, raporton BBC
Niveli aktual nuk ka rënë ende nën shifrën më të ulët të regjistruar ndonjëherë këtu, në tetor 2018. Matja atëherë ishte 25 cm. Matja është marrë nga e njëjta pikë referimi në ujë, jo pika më e thellë në shtratin e lumit.
Rhine është një nga lumenjtë më të mëdhenj të Evropës dhe industria këtu mbështetet në maune për të marrë dhe transportuar lëndë të para dhe produkte të gatshme drejt dhe nga termocentralet dhe fabrikat që rreshtojnë bregun e lumit.