Tragjedia në Tetovë, raportet forenzike dhe analizat e ekspertizës drejt fundit

Raportet forenzike dhe analizat e ekspertizës për zjarrin në spitalin modular në Tetovë janë drejt përfundimit, ka deklaruar sot kryeministri, Zoran Zaev i cili pret të publikohen sa më shpejtë.
“Sa më shpejtë, aq më mirë që të zgjidhim të gjitha dilemat. Jeta vazhdon, politikanët janë në fushatë, po ndodhin aktivitete të përditshme. Është e radhës të publikohet ai raport që të mund edhe unë ta them qëndrimin tim me rastin e dorëheqjeve të ofruara nga ministri, zëvendësministri…”, ka thënë Zaev .
Zjarri në spitalin modular në Tetovë shpërtheu më 8 shtator ku jetën humbën 14 persona, ndërsa 12 u lënduan.
Pas zjarrit dhanë dorëheqje ministri i Shëndetësisë, Venko Filipçe, zëvendësministri i Shëndetësisë, Ilir Hasani, drejtori i spitalit të Tetovës, Florin Besimi dhe shefi ekonomik i spitalit, Artan Etemi.
Në hetimin krahas organeve vendore të hetuesisë u përfshinë edhe ekspertë gjermanë. /TV21