Ursula von der Leyen akuzon Rusinë se po shantazhon me gaz

Presidentja e Komisionit Evropian Ursula von der Leyen akuzoi Rusinë se po përpiqet të “shantazhojë” bllokun me gaz, pasi gjigandi rus i energjisë Gazprom ndaloi furnizimet në Poloni dhe Bullgari.
“Njoftimi i Gazprom është një tjetër përpjekje e Rusisë për të na shantazhuar me gaz. Ne jemi të përgatitur për këtë skenar. Ne jemi duke hartuar përgjigjen tonë të koordinuar të BE-së. Evropianët mund të besojnë se ne qëndrojmë të bashkuar dhe në solidaritet me shtetet anëtare të prekura”, ka shkruar von der Leyen,
Në një deklaratë, von der Leyen ka thënë se një takim midis grupit të koordinimit të gazit të BE-së ishte duke u zhvilluar për të hartuar një përgjigje.
Kujtojmë që, Gazprom ndërpreu furnizimin me gaz për Poloninë dhe Bullgarinë pasi të dy vendet refuzuan të paguanin në rubla.
Rusia kishte paralajmëruar vendet “jomiqësore” muajin e kaluar se do të duhet të paguajnë për gazin në monedhën ruse duke filluar nga 1 prilli, ose rrezikojnë të ndërpriten.
Mosmarrëveshja e pagesave kërcënon furnizimet me gaz që kanë vazhduar të rrjedhin, edhe pse trupat ruse bombarduan qytetet kryesore në Ukrainë dhe Perëndimi vendosi sanksione gjymtuese ndaj ekonomisë ruse.
BE-ja po planifikon të ulë konsumin e gazit natyror rus këtë vit, ndërsa përgatitet për një shkëputje të plotë me furnizuesin e saj të vetëm më të madh të energjisë. /21Media