Gjykata Speciale iu ka vazhduar masën e paraburgimit, dy ish krerëve të UÇK-së, Hysni Gucatit e Nasim Haradinajt, të cilët po akuzohen për veprën penale të pengimit të administrimit të drejtësisë. Kjo masë iu është vazhduar me arsyetimin se, akoma ekziston rreziku që ata mund të udhëtojnë me aeroplan, të pengojnë procedurat dhe të kryejnë vepra të tjera penale. Dy krerët e Organizatës së Veteranëve të Luftës, Gucati dhe Haradinaj po vazhdojnë të mbahen në paraburgim.

Hysni Gucati dhe Nasim Haradinaj ishin arrestuar më 25 shtator në Prishtinë e më pas ishin transferuar për në Hagë. Ata ishin arrestuar pasi dyshoheshin se kishin ndërmarrë veprime për pengim të punës së dhomave të specializuara duke shpërndarë informacione konfidenciale dhe frikësuar dëshmitarët.

Pak muaj pas arrestimit, prokurorët e specializuar kishin ngritur aktakuzë ndaj tyre e cila ishte konfirmuar më 14 dhjetor të vitit 2020.Hysni Gucati në seancën e parë të paraqitjes së tij, ishte deklaruar i pafajshëm ndërsa Haradinaj nuk kishte dhënë ndonjë deklaratë në lidhje me fajësinë apo pafajësinë e tij.Sipas aktakuzës në prill dhe shtator 2020, Gucati dhe Haradinaj bënë deklarata akuzuese për dëshmitarë që bashkëpunojnë me Zyrën e Prokurorit të Specializuar dhe për persona të tjerë.

Sipas Prokurorisë këta persona ishin quajtur gënjeshtarë, bashkëpunëtorë dhe tradhtarë nga dy krerët e OVL të UÇK-së.Përpos kësaj pike të dy akuzohen edhe se shpërndanë pa autorizim informacion konfidenciale dhe jopublike në lidhje me hetimet e Task Forcës Hetimore Speciale (‘TFHS’) dhe Prokurorisë së Specializuar. Përveç shpërndarjes, ata akuzohen se inkurajuan të tjerët të shpërndanin më tej informacion konfidencial dhe jopublik.Sipas Zyrës së Prokurorit të Specializuar, Gucati dhe Haradinaj organizuan së bashku me disa të tjerë shpërndarjen e paautorizuar të informacionit konfidencial dhe jopublik përmes thirrjes së konferencave për media.

Në këto konferenca në aktakuzë thuhet se, mbi tavolina u ekspozuan dokumentet e Dhomave të Specializuara.Sipas prokurorisë ata mbajnë përgjegjësi për pengim të personave zyrtarë në kryerjen e detyrave zyrtare, frikësim të dëshmitarëve, hakmarrje dhe shkelje të fshehtësisë së procedurës.#Gjykata Speciale, Nasim Haradinaj, Hysni Gucati, Paraburgim./kallxo